Eron elchisi Samarqandning tarixiy merosiga oid bayonotlar sabab TIVga chaqirtirildi
Eronning Zimbabve va Armanistondagi elchixonasi X tarmog‘ida Samarqanddagi obidalarni 'eron-islom sivilizatsiyasi'ga mansub deb atadi. Holat ortidan Eronning O‘zbekistondagi elchisi TIVga chaqirtirilib, unga qat’iy norozilik notasi topshirildi hamda mazkur postni o‘chirish talab qilindi.
**Eron elchisi Samarqandning tarixiy merosiga doir bayonotlar tufayli TIVga chaqirildi**
23-oktabr kuni Eronning O‘zbekistondagi favqulodda va muxtor elchisi Muhammad Ali Iskandariy Tashqi ishlar vazirligiga chaqirildi va unga mamlakatning qat’iy e’tirozini bildiruvchi norozilik notasi topshirildi.
Bunga Eronning xorijdagi bir qator diplomatik vakolatxonalari, jumladan Armaniston va Zimbabvedagi elchixonalari tomonidan X ijtimoiy tarmog‘ida joylashtirilgan materiallar sabab bo‘ldi. Elchixona sahifasida Samarqanddagi Registon maydoni fonida videoga tushgan AQSh senatori Marko Rubio va boshqalarning surati ulashilib, obidalardagi arkalar “eron-islom sivilizatsiyasining o‘ziga xos xususiyati” ekani da’vo qilingan. O‘zbekiston TIV bu bayonotni Samarqandning tarixiy-madaniy merosini bir tomonlama va siyosiy maqsadlarda talqin qilish deb baholadi.
Uchrashuv chog‘ida Samarqand, Buxoro, Xiva va O‘zbekistonning boshqa tarixiy shaharlari merosi ko‘p asrlar davomida shakllangan boy va ko‘p qirrali tarixiy-madaniy taraqqiyotning ajralmas qismi ekani ta’kidlandi.
Samarqandning tarixiy-madaniy qiyofasi o‘zbek xalqining ko‘p asrlik tarixi, davlatchilik an’analari va madaniy taraqqiyotini aks ettirishi qayd etildi.
TIV vakillari diplomatik vakolatxonalarning rasmiy axborot resurslarida e’lon qilinadigan materiallar o‘zaro hurmat va ishonch tamoyillariga mos bo‘lishi, tarixiy-madaniy masalalarning siyosiylashtirilishiga olib kelmasligi kerakligini urg‘uladi. Eron tomoniga tegishli postlarni ijtimoiy tarmoqlardagi sahifalardan olib tashlash hamda kelgusida bunday holatlar takrorlanishiga yo‘l qo‘ymaslik talabi qo‘yildi.
Xabar yakunida O‘zbekiston Eron bilan o‘zaro hurmat va ishonchga asoslangan munosabatlarni qadrlashi, shu bilan birga tarixiy-madaniy merosni biryoqlama talqin qilishga nisbatan prinsipial pozitsiyasini saqlab qolishi qayd etilgan.