Eron AQSHga qarshi urushni 3 yilga uzaytirmoqchi
Eron AQSHga qarshi urushni 3 yilga uzaytirish niyatida
Eron Islom inqilobi qo‘riqchilari korpusi (IIQK) bosh qo‘mondoni maslahatchisi, brigada generali Muhammad Rizo Naqdiyning ma’lum qilishicha, Eron o‘z xavfsizligini ta’minlash maqsadida AQSH bilan urushni Donald Trampning prezidentlik muddati yakuniga qadar davom ettirmoqchi.
Naqdiy shunday dedi: “Dushman bizga hujum qilishga hech qachon jur’at eta olmasligi va biz xavfsiz yashashimiz uchun tiyib turishga erishishimiz zarur. Bunga erishish yo‘llaridan biri – urushni keyingi prezidentlik muddatigacha cho‘zishdir. Shunday talafot yetkazilsinki, toki kimdir Eronga hujum qilmoqchi bo‘lsa, buning uchun tovon to‘lashi kerakligini bilsin”.
U Eronning savdo kemalariga qilayotgan hujumlari dengiz huquqini buzish emasmi, degan savolga ham javob berdi: “Urush sharoitida biz xavf tug‘diradigan har qanday transport yo‘lagini nazorat qilishimiz mumkin. Mana shu – xalqaro huquq. Dunyoning urush ketayotgan istalgan nuqtasida shu qonun amal qiladi”.
Trampning ikkinchi prezidentlik muddati 2025-yil yanvarida boshlangan bo‘lib, u AQSHning keyingi prezidenti qasamyod keltiradigan 2029-yil 20-yanvarda o‘z lavozimini tark etadi. Bu muddat Tramp uchun oxirgisi bo‘ladi, chunki AQSH Konstitutsiyasiga kiritilgan 22-tuzatishga ko‘ra, bir shaxs ikki martadan ortiq prezidentlik lavozimini egallay olmaydi. Tramp 2016 va 2024-yillardagi saylovlarda allaqachon g‘alaba qozongan edi.
AQSH 28-fevral kuni Isroil bilan birgalikda Eronga qarshi harbiy operatsiya boshlagan edi. Bunga javoban Tehron Isroil, AQSH bazalari va Yaqin Sharqdagi neft infratuzilmasiga raketa va dronlar bilan zarba berdi. Bundan tashqari, Eron Hormuz bo‘g‘ozini yopib qo‘ydi.
18-iyun kuni AQSH va Eron harbiy harakatlarni to‘xtatish va muzokaralarning yangi bosqichini boshlashni ta’minlaydigan vaqtinchalik anglashuv memorandumini imzoladi. Biroq oradan bir necha kun o‘tgach, AQSH rahbariyati Eronni o‘t ochishni to‘xtatish rejimini buzganlikda aybladi. Tehron ham qarshi tomonga shunday ayblovlar qo‘ydi. Avgust oyida Tramp kelishuv tufayli Eronga yangi zarbalar berishdan voz kechganini aytdi.