Eron AQSH sanksiyalariga qaramay xorijiy valyuta zaxirasi yetarli ekanini ma’lum qildi

Eron Markaziy banki raisi Abdolnosir Himmatiy 1-sentyabr kuni ma’lum qilishicha, AQSH sanksiyalariga qaramay, Eron yetarli miqdorda xorijiy valyuta zaxirasiga ega. Bu bayonot AQSH moliya vaziri Skott Bessentning Tehron iqtisodiy urushda mag‘lub bo‘layotgani sababli keskin choralar ko‘rayotgani haqidagi avvalgi so‘zlariga javoban yangradi.

Tasnim axborot agentligining xabar berishicha, Himmatiy Markaziy bank valyuta bozoridagi beqarorlikni bartaraf etish uchun 2 milliard dollargacha mablag‘ ajratishga tayyorligini bildirdi. U AQSH prezidentiga murojaat qilib, "Eronda xorijiy valyuta bor va u yetarli darajada", deya ta'kidladi.

Ushbu bayonot bozorlardagi xavotirni kamaytirishga qaratilgan edi, chunki avvalroq Eron rasmiylari, jumladan prezident Mas’ud Pezeshkiyon ham AQSH sanksiyalari va dengiz blokadasi tufayli mamlakat iqtisodiyotida qiyinchiliklar ortib borayotganini aytgan edi.

Himmatiyning so‘zlariga ko‘ra, Markaziy bank xorijiy valyutadagi tushumlarni yig‘ishda davom etmoqda va mamlakatda ichki zaxiralar hamda boshqa resurslar mavjud. Biroq, u bu resurslarning tafsilotlarini oshkor qilmadi.

"Men xalqqa to‘liq xolislik bilan aytamanki, iqtisodiy sharoit va tirikchilikni boshqarish qiyinlashdi. Lekin barbod bo‘lish hech qachon yuz bermagan va yuz bermaydi ham. Bu da’volar shunchaki psixologik urushdir va bu g‘ubor tez orada tarqaydi", dedi Himmatiy.

Avgust oyida Eron valyutasi rekord darajada qadrsizlanib, AQSH dollariga nisbatan 2 million rialni tashkil etgan edi. Iyul oyida esa yillik inflyatsiya 66 foizga yetgan.

31-avgust kuni AQSH moliya vaziri Skott Bessent Eron AQSH sanksiyalariga jiddiy qarayotganini ta’kidlab, "Ular iqtisodiy jihatdan yutqazayotgani sababli harbiy harakatlar bilan javob qaytarmoqda", degan edi.

Vashington Tehronga o‘z talablarini bajarishga majbur qilish uchun iqtisodiy bosimni kuchaytirmoqda. Bessent Eron bilan biznes yuritayotgan shaxslar va kompaniyalar ham AQSH sanksiyalariga duch kelishi mumkinligidan ogohlantirgan.

Shu bilan birga, AQSH prezidenti Tramp Eronni "rasman inqirozga uchragan davlat" deb atadi. U Tehron rahbariyati mamlakatni boshqarishga qodir emasligini va harbiy kuchini yo‘qotganini ta’kidlab, hatto harbiylar va politsiyasiga maosh to‘lamayotganini da’vo qildi.