Erkak Sardiniyadagi gʻorda 26 soat qolib ketganidan keyin qutqarib olindi
31 yoshli gʻor mutaxassisi 100 dan ortiq favqulodda xizmat xodimlari uni ozod qilish uchun ish olib borganidan soʻng, yer ostida 32 fug chuqurlikda tirik holda topildi.
Sardiniyadagi gʻorda 26 soat qolib ketgan erkak qutqarildi
Italiyaning Sardiniya orolidagi gʻorda tosh koʻchishidan soʻng yer ostida taxminan 10 metr (32 fut) chuqurlikda 26 soatga yaqin qolib ketgan erkak qutqarildi.
ANSA mahalliy yangiliklar agentligining xabar berishicha, 31 yoshli Luka Olmetto yakshanba kuni Italiya orolidagi Urzuley shaharchasida joylashgan Gorropeddu gʻorida qisilib qolgan.
Alp va speleologiya togʻ-qutqaruv milliy xizmatining maʼlum qilishicha, 100 dan ortiq favqulodda vaziyatlar xodimlari ishtirokida 24 soatdan ortiq davom etgan sinchkovlik bilan olib borilgan yirik qutqaruv amaliyotidan soʻng, Olmetto dushanba kuni tushdan keyin sogʻ-omon topildi va olib chiqildi.
Mahalliy OAV xabariga koʻra, gʻorlarni oʻrganuvchi Olmetto qoʻshimcha tibbiy koʻrik va davolanish uchun vertolyotda shifoxonaga yetkazilgan.
U Sardiniyaning markaziy-sharqiy qismidagi togʻ tizmasi boʻylab joylashgan gʻorni tadqiq qilayotgan vaqtda, yakshanba kuni tushdan keyin toʻsatdan tosh koʻchishi yuz bergan.
Shundan soʻng Alp va speleologiya togʻ-qutqaruv milliy xizmati hamda mahalliy oʻt oʻchirish boʻlimi rahbarligida qutqaruv amaliyoti boshlandi.
Alp va speleologiya togʻ-qutqaruv milliy xizmati ijtimoiy tarmoqlarda guruhning "nihoyatda tob-tor" maydonlarda ishlayotgani aks etgan fotosuratlar bilan birga eʼlon qilgan bayonotida bu "ayniqsa murakkab amaliyot" boʻlganini bildirdi.
Bayonotda aytilishicha, gʻor gʻovagiga yetib borish uchun vayronalar ehtiyotkorlik bilan qoʻlda tozalangach, erkak yuzaga olib chiqilgan.
Shundan soʻng speleologning ahvoli barqarorlashtirilgan va vertolyotda shifoxonaga olib ketilgan, deyiladi xabarda.
Olmetto tugʻilib oʻsgan Sardiniyaning shimoli-gʻarbidagi Kodronjianos shaharchasi kengashi ijtimoiy tarmoqdagi postida shunday dedi: "Butun Kodronjianos kutgan xushxabar bir necha soatlik katta xavotirlardan soʻng nihoyat keldi: Luka gʻordan chiqdi!
"Butun jamiyat qutqaruv amaliyotlarini hayajon bilan kuzatib borgan qiyin soatlar boʻldi", deb davom etadi post.
Kodronjianos kengashi "unga yetib borish uchun tinim bilmay mehnat qilgan" qutqaruvchilarga minnatdorchilik bildirdi.