«Endi men boshqa tomonda boʻlaman». Messining xayrlashuv nutqi
39 yoshli futbolchi Argentina milliy jamoasi muxlislari bilan 10 daqiqalik hayajonli nutq soʻzlab xayrlashdi.
«Endi men boshqa tomonda boʻlaman». Messining xayrlashuv nutqi
Lionel Messi Argentina milliy jamoasi bilan xayrlashdi. 7-oktabrga oʻtar kechasi 39 yoshli forvard Beninga qarshi (3:0) milliy jamoa safidagi soʻnggi uchrashuvini oʻtkazdi. 10-daqiqada (futbolchi butun faoliyati davomida shu raqamli futbolkada toʻp surgan) oʻyin bir muddat toʻxtatildi — futbolchilar uni oʻrnidan turib olqishlashdi, maydondagi futbolchilar esa uning yoniga kelib qoʻlini siqib qoʻyishdi.
Uchrashuvdan soʻng hujumchi «Monumental» stadionida toʻplangan muxlislar oldida 10 daqiqa davom etgan ta’sirli nutq soʻzladi.
«Ketgim kelmayapti»
«Bugun nimadir deyish juda qiyin. Hissiyotlar joʻsh urmoqda, boshimda ming xil fikr kezib yuribdi. Albatta, ilkis xayolimga kelgani – otam. Oldinroq xayrlashuv maktubimda aytganimdek, faqat minnatdorchilik bildira olaman. 20 yildan ortiq vaqt mobaynida bu futbolkani kiyib yurish men uchun katta faxr edi. Boshimizdan oʻtgan eng ogʻir damlarda ham kurashishdan, jang qilishdan, borimni berishdan hech qachon toʻxtamadim va doimo shu yerda boʻlishni xohladim. Bu yerga boshqa qaytmasligimni anglash menga juda qattiq azob beradi.
Ont ichamanki, bir umrga bu yerda qolishni istardim. Argentina milliy jamoasi safida oʻynash – sen bilan sodir boʻlishi mumkin boʻlgan eng goʻzal narsadir. Yuqorida aytganimdek, butun umr shu yerda boʻlishni istardim, lekin vaqti keldi. Oxirgi jahon chempionati – men boshdan kechirgan narsalarning barchasi ulkan sinov boʻldi. Oʻzimning va butun mamlakatning orzusini roʻyobga chiqarish – yana jahon chempioni boʻlish baxtiga muyassar boʻldik.
Oxirgi jahon chempionatida biz juda yaqin edik va toʻgʻrisini aytsam, odamlar aytganidek, hech qanday gʻayrioddiy narsa sodir boʻlmadi. Angliya bilan oʻyin bizdan juda koʻp kuchni – ham jismoniy, ham hissiy kuchni tortib olgandi. Juda katta energiya sarflangandi. Keyingi bosqichga qiynalib chiqdik. Ammo gʻalaba uchun kurashdik, bu futbolkani kiyganda doim shunday boʻlgan.
Bu yoʻlni birga bosib oʻtgan barcha hamrohlarim bilan – nafaqat birgalikda chempionlik ta’mini totgan, balki ungacha boʻlgan sheriklarim bilan ham chempion boʻlishga juda yaqin kelgandik. Hech qachon shubha qilmang: men bilan birga oʻynaganlarning barchasi doim bu futbolka uchun borini berishgan. Har doim.
Barcha sheriklarimga birgalikda oʻtgan lahzalar uchun minnatdorchilik bildiraman. Ular juda koʻp. Ular menga bolalik orzularim – jahon chempioni boʻlish, Amerika kubogini va Finalissimani yutishda yordam berishdi.