Elektr ta’minoti barqarorligi — O‘zbekistonda data-markazlar qurmoqchi bo‘lgan investorlar uchun asosiy masala — PA
O‘zbekistonda data-markazlar qurishni ko‘rib chiqayotgan xalqaro investorlar, birinchi navbatda, elektr ta’minoti barqarorligi haqida so‘ramoqda, dedi Prezident administratsiyasi vakili Bobur Xodjayev. Hukumat yashil energetika salohiyati yuqori bo‘lgan Qoraqalpog‘istonga alohida e’tibor qaratmoqda.
PA: O‘zbekistonda data-markazlar qurishni istagan investorlar uchun elektr ta’minoti barqarorligi asosiy masala
O‘zbekistonda data-markazlar barpo etishni rejalashtirayotgan xalqaro investorlar uchun elektr ta’minotining uzluksizligi muhim ahamiyat kasb etmoqda. Bu haqda 24-avgust kuni Toshkentda bo‘lib o‘tgan Silk Road Finance & Technology Forumida Prezident administratsiyasining Moliyaviy texnologiyalar, raqamlashtirish va sun’iy intellekt bo‘yicha departamenti rahbari Bobur Xodjayev ma’lum qildi, deya xabar beradi Gazeta muxbiri.
Xodjayevning so‘zlariga ko‘ra, so‘nggi olti yil ichida mamlakatda energetika quvvatlarini oshirish bo‘yicha sezilarli ishlar amalga oshirilgan, jumladan, elektr energiyasini xarid qilish bo‘yicha kelishuvlar (PPA) tuzilgan.
"Biz ko‘plab PPA kelishuvlarini imzoladik. Hozirda elektr energiyasi ishlab chiqarishning 30 foizdan ortig‘i yashil energetika hisobiga to‘g‘ri keladi. Bu O‘zbekistonda data-markazlar qurishga tayyor bo‘lgan xalqaro investorlar uchun yana bir jozibador omildir, chunki mamlakat ularni yashil elektr energiyasi bilan ta’minlay oladi", — dedi Bobur Xodjayev.
Hukumat bunday obyektlarni joylashtirish uchun Qoraqalpog‘istonga alohida e’tibor qaratmoqda.
"Biz data-markazlar qurish uchun Qoraqalpog‘istonni ataylab tanladik, chunki Qoraqalpog‘iston qayta tiklanuvchi energiyaning katta zaxiralariga ega. U yerda allaqachon shamol va quyosh elektr stansiyalarini qurayotgan bir nechta xalqaro investorlar bor", — dedi Prezident administratsiyasi vakili.
Bobur Xodjayevning ta’kidlashicha, hukumat Energetika vazirligi bilan birgalikda kelajakdagi data-markazlarni barqaror elektr energiyasi bilan ta’minlash ustida ishlamoqda.
"Ammo, albatta, elektr ta’minoti barqarorligi — muzokaralar davomida investorlar bizga berayotgan birinchi raqamli savoldir", — dedi u.
Muhokamada ishtirok etgan S&P Global Ratings xalqaro reyting agentligi direktori Roman Ribalkin tez iqtisodiy o‘sish va aholi sonining oshishi mintaqa energetika quvvatlarini yanada kengaytirishni talab qilayotganini qayd etdi.
"Bu O‘zbekistonda yashil energetikani jadal rivojlantirishga e’tibor qaratilayotganining sabablaridan biridir. Bunda Fors ko‘rfazi mamlakatlaridan kelayotgan investorlar, shubhasiz, yetakchi o‘rin tutmoqda", — dedi S&P Global Ratings vakili.
U, shuningdek, elektr energiyasiga bo‘lgan talabning o‘sishini Markaziy Osiyoda atom energetikasining rivojlanishi bilan bog‘ladi.
"Shuning uchun biz atom energetikasi tomon harakatni ham ko‘ryapmiz. O‘zbekistonda Jizzax viloyatida AES loyihasi bor, Qozog‘istonda esa dastlabki ishlab chiqish bosqichida bo‘lgan yirik atom elektr stansiyasi loyihasi mavjud. Umuman olganda, energetika kun tartibidagi asosiy masalalardan biri bo‘lib, yashil energetika, shubhasiz, bu chaqiriqqa javoblardan biridir", — dedi Roman Ribalkin.
BCG boshqaruv direktori Rza Nuriyev 2025-yil iyun oyida Qoraqalpog‘istonni 2035-yilgacha rivojlantirishning "to‘rt ustuni"ni taqdim etgan edi.
"Arzon yashil energiya, energiya talab qiladigan ishlab chiqarish, go‘sht va sut yetishtirish va ekzotik turizm uchun eng yaxshi maydon" — Qoraqalpog‘istonni kelajakda shunday qabul qilishadi, deb hisoblaydi u.