Eldor Shomurodov faoliyatini AQSH chempionatida davom ettirishi mumkin — insayder

Eldor Shomurodov faoliyatini AQSH chempionatida davom ettirishi mumkinligi haqida insayder xabar berdi.

O‘zbekistonlik hujumchi Eldor Shomurodovga AQSHning MLS chempionatida ishtirok etuvchi “Sent-Luis Siti” klubi qiziqish bildirmoqda. Hozirda Turkiyaning “Bashakshehir” jamoasida to‘p surayotgan Shomurodovni o‘z safiga qo‘shib olish istagi borligi haqida sport jurnalisti Og‘uz Oruch ma’lum qildi.

Manbaning xabariga ko‘ra, MLS klubi 31 yoshli hujumchining transferini amalga oshirish bo‘yicha muzokaralarni boshlab yuborgan.

Eslatib o‘tamiz, Shomurodov o‘tgan mavsum Turkiya Superligasida 34 ta o‘yinda maydonga tushib, 22 ta gol urgan va 4 ta golli uzatmani amalga oshirgan. Futbolchining “Bashakshehir” bilan amaldagi shartnomasi 2028-yilning iyunigacha mo‘ljallangan. Shuningdek, u O‘zbekiston terma jamoasi tarixidagi eng yaxshi to‘purar hisoblanadi. Shomurodov ilgari Italiyaning “Jenoa”, “Roma”, “Spetsiya” va “Kalyari” kabi mashhur klublarida ham o‘ynagan.

Ma’lumot uchun, “Sent-Luis Siti” klubi 2019-yilda tashkil etilgan bo‘lib, MLSdagi faoliyatini 2023-yildan boshlagan. Jamoa AQSHning Missuri shtati, Sent-Luis shahrida joylashgan. Klub o‘z uy uchrashuvlarini “Energizer Park” (CityPark nomi bilan ham tanilgan) stadionida o‘tkazadi.