Dunyoning eng serqatnov konteyner portlari eʼlon qilindi
Shanhay 2025-yil yakunlari boʻyicha ketma-ket 16-marta dunyoning eng serqatnov konteyner porti boʻldi. U ikkinchi oʻrindagi Singapurni 10 million TEUdan ziyod ortda qoldirgan. Dunyoning eng yirik sakkiz konteyner portining barchasi Sharqiy yoki Janubi-sharqiy Osiyoda joylashgan.
Dunyoning eng serqatnov konteyner portlari ma’lum qilindi
Hajmlar TEU — 20 futlik, ya’ni taxminan 6,1 metr uzunlikdagi standart konteynerga teng shartli birlikda hisoblandi. Statistikaga yuklangan ham, bo‘sh konteynerlar ham kiritildi.
Shanhay portining konteyner aylanmasi AQShning eng yirik konteyner porti — Los-Anjeles ko‘rsatkichidan besh barobardan ham oshgan.
Reytingdagi 30 portning umumiy konteyner aylanmasining qariyb yarmi Xitoy portlari hissasiga to‘g‘ri kelgan. Bu hisobga 13 million TEU ko‘rsatkichiga ega Honkong ham kiritilgan.
Shanhay porti faqat shaharning o‘ziga xizmat qilmaydi. Ichki suv yo‘llari va temiryo‘llar uni Yanszi daryosi bo‘yidagi sanoat markazlari bilan bog‘laydi. Shu orqali Xitoyning markaziy va sharqiy hududlaridagi ishlab chiqaruvchilar o‘z mahsulotlarini xorijiy bozorlarga chiqaradi.
Ishlab chiqarishning Osiyodagi boshqa mamlakatlarga ham kengayishi va Xitoyning Janubi-sharqiy Osiyo bilan savdo aloqalarining mustahkamlanishi mintaqaviy yuk tashish tarmoqlarini rivojlantirmoqda. Bu jarayonda Xitoy portlari muhim o‘rnini saqlab qolmoqda.
Singapurning port modeli esa ko‘proq xalqaro dengiz yo‘nalishlarini bir-biriga bog‘lashga asoslangan. U dunyodagi 600 dan ortiq port bilan aloqaga ega.
Bu yerda konteynerlar bir kemadan boshqasiga o‘tkazilib, so‘ng manzili sari yo‘l oladi. Shu ma’noda Singapurni yo‘lovchilar boshqa reysga o‘tadigan tranzit aeroportga qiyoslash mumkin. Yuklarni qayta ortishga asoslangan bu tizim kichik shahar-davlatning dunyoda ikkinchi o‘ringa chiqishiga yordam bergan.
Chuqur suvli prichallar va avtomatlashtirilgan elektr kranlar yangi terminallarga eng yirik konteyner tashuvchi kemalarni qabul qilish imkonini beradi.
Singapur Tuas portini qurish orqali quvvatini yana kengaytirmoqda. Loyiha konteyner operatsiyalarini bir joyga jamlashni nazarda tutadi. Uni 2040-yillarda to‘liq yakunlash rejalashtirilgan bo‘lib, shundan so‘ng portning yillik o‘tkazish quvvati 65 million TEU ga yetishi kutilmoqda.