Dunyoning eng innovatsion mamlakatlari aniqlandi
2026-yilgi Global innovatsiyalar indeksida Shveysariya birinchi oʻrinni egalladi. Shvetsiya va AQSH yetakchi uchlikka kirgan boʻlsa, Xitoy Germaniya, Yaponiya va Fransiyani ortda qoldirib, oʻninchi pogʻonadan joy oldi.
Dunyoning eng innovatsion davlatlari ma’lum qilindi
Jahon intellektual mulk tashkiloti — WIPO tuzgan reytingda 139 ta mamlakat va iqtisodiyot 79 ta ko‘rsatkich asosida baholangan.
Shveysariya 66,7 ball bilan peshqadam bo‘lgan. Shvetsiya 63,2 ball, AQSH esa 62,3 ball to‘plagan. Janubiy Koreya to‘rtinchi, Singapur beshinchi o‘rinni egallagan.
Indeks innovatsion salohiyatning besh yo‘nalishini baholaydi: institutlar sifati, inson kapitali va ilmiy tadqiqotlar, infratuzilma, bozorning rivojlanganligi hamda biznesning rivojlanish darajasi. Yana ikki guruh ko‘rsatkich bilim va texnologiyalar sohasidagi yutuqlar hamda ijodiy natijalarni aks ettiradi.
Yevropa mamlakatlari birinchi 25 talikdagi 14 ta o‘rinni, yetakchi o‘ntalikda esa oltita pog‘onani egallagan. Ularning barchasi yuqori daromadli iqtisodiyotlar toifasiga kiradi.
Yevrokomissiyaning 2026-yilgi Yevropa innovatsiyalar tablosiga ko‘ra, YeIning innovatsion ko‘rsatkichlari 2019-yildan buyon o‘sib kelmoqda. Biroq WIPO Yevropa oldida ilmiy yutuqlar va sanoat salohiyatini tez o‘suvchi kompaniyalarga aylantirish vazifasi turganini ta’kidlagan.
Biznesni kengaytirish uchun mablag‘ topish, mehnat unumdorligini oshirish va raqamli ko‘nikmalarga ega mutaxassislarni tayyorlash ham muhim masalalar bo‘lib qolmoqda. Sun’iy intellekt kabi texnologiyalar kengaygani sari malakali kadrlarga ehtiyoj yanada ortmoqda.
Osiyodagi yetakchilar turli natijalarni namoyish etgan. Xitoy umumiy reytingda 57 ball bilan o‘ninchi o‘rinda turgan bo‘lsa-da, innovatsiyalarga yo‘naltirilgan resurslar bo‘yicha 22-o‘rinni, innovatsion natijalar bo‘yicha esa beshinchi o‘rinni egallagan.
Bu farq Xitoyning innovatsion natijalar bo‘yicha mavqei resurslar ko‘rsatkichlaridagi o‘rnidan ancha yuqori ekanini ko‘rsatadi.
Hindiston, Vetnam, Filippin va Indoneziya ham sezilarli o‘sish qayd etgan. O‘rta daromadli ushbu mamlakatlar 2013-yildan buyon reytingdagi o‘rinlarini ancha yaxshilagan.
Birlashgan Arab Amirliklari esa 25-o‘rinni egallab, ilk bor yetakchi 25 talikka kirgan. Saudiya Arabistoni, Qatar va Kuvayt ham 2026-yilda o‘z mavqeini yaxshilagan.
Fors ko‘rfazidagi bu davlatlar uchun asosiy vazifalardan biri — katta investitsiyalar, rivojlangan infratuzilma va davlat institutlari imkoniyatlarini aniq ilmiy-texnik hamda ijodiy natijalarga aylantirishdir.