Dunyo bo‘ylab 2025-yilda 7 mingta gumanoid robot sotildi
Dunyo bo‘ylab 2025-yilda 7 mingta gumanoid robot sotildi
Reuters Xalqaro robototexnika federatsiyasi (IFR) ma’lumotlariga tayangan holda xabar berishicha, 2025-yilda dunyo bo‘ylab sanoat va professional xizmatlar uchun mo‘ljallangan qariyb 7 mingta gumanoid robot sotilgan.
IFR mezonlariga ko‘ra, gumanoid robot — bu odamlar uchun mo‘ljallangan muhitda avtonom ishlay oladigan va odamsimon tashqi ko‘rinishga ega robotdir. Oyoqlarning bo‘lishi shart emas.
Hozircha gumanoid robotlar savdosi an’anaviy robototexnika bozori hajmidan ancha kichik. 2024-yilda dunyoda qariyb 542 mingta sanoat roboti sotilgan bo‘lsa, transport, mehmonxona biznesi va tozalash sohalari uchun xizmat ko‘rsatuvchi gumanoid robotlar savdosi qariyb 199 ming donani tashkil etgan.
IFR bosh kotibi Syuzanna Billerning aytishicha, 2025-yilda sotilgan gumanoid robotlarning ko‘pi ishlab chiqarishda ishlatilmagan, balki ma’lumot yig‘ish va sun’iy intellekt modellarini yaxshilash uchun tadqiqot institutlari hamda kompaniyalar tomonidan xarid qilingan.
Gumanoid robotlarni ilk joriy eta boshlagan avtomobil zavodlarida allaqachon tajriba loyihalari yo‘lga qo‘yilgan. Billerning so‘zlariga ko‘ra, ayrim holatlarda korxonalar bir nechta yoki o‘nlab shunday robotlardan foydalanmoqda.
Reuters’ning avvalgi xabarlariga ko‘ra, Xitoy regulyatorlari Pekin uchun ustuvor bo‘lgan texnologik yo‘nalishlardan biri atrofidagi shov-shuvni kamaytirish maqsadida gumanoid robot ishlab chiqaruvchi zavodlarning birjaga chiqish rejalarini cheklay boshlagan.
Nazoratning kuchayishi, xususan, Unitree Robotics aksiyalarining keskin ko‘tarilib, tez orada pasayib ketishi ortidan yuz berdi. Avgust oyida aksiyalar besh baravardan ko‘proqqa qimmatlashgan, biroq keyinchalik o‘zining eng yuqori qiymatidan 55 foizga arzonlashgan.