Dronlar tunda yana Moskva va Peterburgdagi aeroportlar faoliyatini toʻxtatib qoʻydi
Qariyb 200 ta reys qoldirilgan yoki bekor qilingan. The Atlantic Ukrainaning Rossiyadagi aeroportlar faoliyatini falaj qilishga qaratilgan kampaniyasi «endigina boshlanayotgani» haqida yozdi.
Dronlar tunda yana Moskva va Peterburg aeroportlari ishini izdan chiqardi
15-oktabr kuni kechqurun Moskvaning Sheremetevo, Vnukovo, Domodedovo va Jukovskiy aeroportlarida reyslarni qabul qilish va joʻnatishga cheklovlar kiritildi.
Rosaviatsiya maʼlumotiga koʻra, bu cheklovlar faqat 16-oktabr tongiga kelib bekor qilingan. Tunda ushbu aeroportlarda qariyb 160 ta reys qolib ketgan. «Moskva» agentligi xabariga ko‘ra, ularning aksari Vnukovo va Sheremetevo aeroportlariga toʻgʻri keladi — mos ravishda 66 va 79 ta.
Moskva meri Sergey Sobyanin maʼlum qilishicha, shu vaqt oraligʻida havo hujumidan mudofaa kuchlari Rossiya poytaxti tomon uchib kelayotgan 94 ta dronni urib tushirgan.
Tunda Peterburgdagi Pulkovo aeroporti ham yopildi. Bu yerda cheklovlar faqat ertalab soat 9 ga kelib olib tashlangan. «Fontanka» nashri yozishicha, tunda uchishi kerak boʻlgan 37 ta reys kechiktirilgan yoki bekor qilingan, shuningdek, aeroport 9 ta reysni qabul qila olmagan. Leningrad oblasti gubernatori Aleksandr Drozdenko soʻzlariga koʻra, region ustida 4 ta dron urib tushirilgan.
The Atlantic nashri jurnalisti Saymon Shuster oʻz manbasiga tayanib, Ukrainaning Rossiyadagi aeroportlar faoliyatini falaj qilishga qaratilgan kampaniyasi «endigina boshlanayotgani» haqida yozdi.
1-sentabr kuni Ukraina prezidenti Volodimir Zelenskiy «dronlar kutilmaganda paydo boʻlishi xavfini inobatga olish»ga chaqirib, Rossiya osmoni «xavfli boʻlib borayotgani» haqida ogohlantirgandi.
Shuster manbalariga koʻra, soʻnggi haftalarda Ukraina uzoq masofaga uchuvchi dronlar yordamida Rossiya aeroportlari atrofidagi havo hududidan foydalanishni qiyinlashtirishga urinmoqda. Biroq hozircha Zelenskiy ancha tajovuzkor taktika nazarda tutilgan dastlabki rejani amalga oshirishni maʼqullamagan.
Kampaniyaning yanada kengroq varianti Rossiyaning havo mudofaa tizimlarini chetlab oʻta oladigan sunʼiy intellektli dronlardan foydalanishni oʻz ichiga oladi. The Atlantic manbalaridan birining aytishicha, bunday dronlarni ommaviy ishlab chiqarish tez orada boshlanishi kerak.
Nashr yozishicha, dastlabki rejani sobiq mudofaa vaziri Mixail Fedorov faol ilgari surgandi. Iyul oyida u isteʼfoga chiqqach, rejani ishlab chiqish toʻxtab qolgan.
Oktabr oyida Moskva aeroportlaridagi toʻxtalishlar koʻpaydi. «Agentstvo» hisob-kitobiga koʻra, oyning dastlabki ikki haftasida toʻrtta aeroportdagi yopilishlar jami 101 soatni tashkil etgan, sentabrda esa bu koʻrsatkich 46 soat boʻlgan. 14-oktabrga oʻtar kechasi Moskvadagi barcha aeroportlarning bir vaqtning oʻzida yopiq boʻlishi boʻyicha rekord darajadagi 7 soatlik holat qayd etilgan.