DHL AQShdan 416 mln yevro boj pulini qaytarib oldi
Germaniya kompaniyalari AQShga bojxona toʻlovlari sifatida toʻlagan 790 mln yevrodan ortiq mablagʻni qaytarib oldi. Eng katta summa - 416 mln yevro DHL logistika kompaniyasiga toʻgʻri kelgan. 2026-yil oxirigacha nemis kompaniyalariga qoʻshimcha mablagʻlar qaytarilishi kutilmoqda.
DHL AQShdan 416 million yevro miqdoridagi bojxona toʻlovlarini qaytarib oldi. Bu haqda Die Wirtschaftswoche ishbilarmonlik jurnali xabar berdi. Jurnal maʼlumotlariga koʻra, Germaniya kompaniyalariga AQShga avval toʻlangan 790 million yevrodan ortiq bojxona toʻlovlari qaytarilgan.
Mablagʻlarning qaytarilishiga 2026-yil fevral oyida AQSh Oliy sudining Donald Tramp maʼmuriyati tomonidan joriy etilgan qoʻshimcha tariflarni noqonuniy deb topgani sabab boʻlgan.
Nemis kompaniyalari orasida eng katta summani DHL logistika kompaniyasi olgan – unga 416 million yevro qaytarilgan. Kompaniya bu mablagʻlarni oʻz mijozlariga qaytarishni rejalashtirmoqda.
Boshqa yirik nemis kompaniyalari ham sezilarli miqdorda mablagʻlarni qaytarib olgan. Tibbiy uskunalar ishlab chiqaruvchi Siemens Healthineers 200 million yevrodan sal koʻproq mablagʻni, sport kiyimlari va poyabzallari ishlab chiqaruvchi Puma 49 million yevroni, laboratoriya uskunalari ishlab chiqaruvchi Sartorius 26 million yevroni, tibbiy uskunalar va shaxsiy himoya vositalari ishlab chiqaruvchi Dräger esa 22 million yevro bojxona toʻlovlarini qaytarib olgan.
Die Wirtschaftswoche taʼkidlashicha, hozirgacha qaytarilgan 790 million yevrodan ortiq mablagʻ yakuniy raqam emas. Baʼzi Germaniya kompaniyalari hali kompensatsiya olmagan va toʻlovlar 2026-yil oxirigacha amalga oshirilishini kutmoqda. Xususan, Adidas 214 million yevrodan 257 million yevrogacha mablagʻni qaytarib olishni rejalashtirmoqda. DHL ham qoʻshimcha kompensatsiya olishni kutmoqda.
Umuman olganda, AQSh hukumati 2025-yil oktabridan 2026-yil iyul oyi oxiriga qadar xorijiy kompaniyalarga qariyb 85 milliard yevro bojxona toʻlovlarini qaytargan. AQSh bojxona xizmati baholariga koʻra, yana 25 milliard yevrodan ortiq mablagʻ qaytarilishi kerak. Taqqoslash uchun, 2024-yil oktabridan 2025-yil iyun oyi oxirigacha Vashington xorijiy kompaniyalarga 4,5 milliard yevrodan sal kamroq mablagʻ qaytargan edi.
2026-yil 20-fevralda AQSh Oliy sudi Trampning oʻnlab savdo hamkorlariga, jumladan Yevropa Ittifoqi davlatlariga keng koʻlamli bojlar joriy etishda prezidentlik vakolatlaridan chetga chiqqan, degan qarorga kelgan. Tramp tariflarni joriy etishda 1977-yilda qabul qilingan Xalqaro favqulodda iqtisodiy vakolatlar toʻgʻrisidagi qonunga (IEEPA) tayangan edi. Sud esa deyarli barcha mamlakatlardan import qilinadigan tovarlarga belgilangan "oʻzaro" tariflar, shuningdek, Kanada, Meksika va Xitoy tovarlariga qoʻyilgan 25 foizlik bojlarni noqonuniy deb topgan.
Tramp Oliy sud qarorini keskin tanqid qilib, uni "chuqur xafsala pir qiluvchi" qaror deb atagan. Shundan soʻng Tramp 10 foizlik yangi bojlarni joriy qilgan. Biroq may oyida Nyu-Yorkdagi AQSh Xalqaro savdo masalalari boʻyicha federal sudi bu tariflarni ham noqonuniy deb topgan.