Degradatsiyaga uchragan yerlarni tiklash uchun yiliga 355 milliard dollar kerak boʻladi - BMT
Birlashgan Millatlar Tashkiloti maʼlumotlariga koʻra, hozirda yerlarni tiklash boʻyicha global majburiyatlarni bajarish uchun ajratilayotgan umumiy investitsiyalar miqdori taxminan 77 milliard dollarni tashkil etadi. Bu esa 278 milliard dollarlik tafovutni yuzaga keltiryapti.
BMT maʼlumotlariga koʻra, 2030-yilga qadar yerlarni tiklash boʻyicha global majburiyatlarni amalga oshirish uchun har yili 355 milliard dollar talab etiladi.
Hozirgi kunda umumiy investitsiyalar taxminan 77 milliard dollarni tashkil etib, bu yillik moliyaviy yetishmovchilikni 278 milliard dollarga yetkazmoqda. Xususiy sektor tomonidan ajratilayotgan mablagʻlar global yerlarni tiklashga yoʻnaltirilgan umumiy mablagʻning atigi 6 foizini tashkil etadi.
Ayni paytda, yaylov yerlarini tiklash boʻyicha tashabbus boshlangan boʻlib, u 1,2 milliard dollarlik 45 ta loyihani oʻz ichiga oladi. Bu Choʻllanishga qarshi kurash konvensiyasi tarixidagi yaylov yerlarini qoʻllab-quvvatlash uchun resurslarni safarbar etish boʻyicha eng yirik tashabbus hisoblanadi.
Shuningdek, hukumatlar, taraqqiyot banklari, jamgʻarmalar va kompaniyalar besh qitʼadagi 23 ta mamlakatda, jumladan, turli rivojlanish bosqichlaridagi loyihalar uchun 1,3 milliard dollarlik moliyalashtirish portfelini eʼlon qildilar. Ushbu summaning 644,5 million dollari yangi moliyalashtirishdir.
BMTning taʼkidlashicha, hozirda 70 dan ortiq mamlakatda qurgʻoqchilikni boshqarish boʻyicha milliy rejalar mavjud. Biroq, moliyalashtirish hajmi va amaliy harakatlar muammoni hal qilishga mutanosib emas.
Yerlarning 40 foizigacha degradatsiyaga uchragan boʻlsa-da, mamlakatlar 2030-yilga borib 1 milliard gektardan ortiq maydonni tiklashga vaʼda bergan.