Chirchiqda poliklinikaga ishga kiritish evaziga 500 dollar pora so‘ragan bosh hamshira sudlandi
Chirchiqda poliklinikaga ishga kiritish uchun 500 dollar pora so‘ragan bosh hamshiraga hukm chiqarildi
Toshkent viloyatining Chirchiq shahrida bir fuqaroni poliklinikaga ishga joylashtirib qo‘yish evaziga 500 dollar talab qilgan bosh hamshira sud tomonidan jazolandi.
Ma’lum bo‘lishicha, ayol 2025-yil noyabridan beri Chirchiq shahar tibbiyot birlashmasiga qarashli oilaviy poliklinikalardan birida bosh hamshira sifatida ishlab kelgan. Joriy yil 25-iyun kuni ushbu muassasaga bir fuqaro hamshira bo‘lib ishga kirish niyatida kelgan. Bosh hamshira uni bosh shifokor huzuriga olib kirib, o‘zi xonadan chiqib ketgan.
Ish so‘rab kelgan fuqaro bosh shifokor bilan suhbatdan chiqqach, bosh hamshira unga Chirchiq shahar tibbiyot birlashmasi boshlig‘i orqali stomatolog hamshirasi lavozimiga ishga kiritib qo‘yishni va’da qilgan. Buning evaziga u 500 dollar so‘ragan. Keyinroq tomonlar 400 dollarga kelishib olgan.
Ayol bu holat bo‘yicha huquqni muhofaza qiluvchi organlarga murojaat qilgan. Ertasi kuni ular pul oldi-berdisi uchun Chirchiq shahridagi xususiy klinikalardan birining oldida uchrashgan. Bosh hamshira kelishilgan pulni olayotgan paytda tezkor tadbir o‘tkazayotgan xodimlar tomonidan ashyoviy dalillar bilan qo‘lga olingan.
Sud jarayonida ayol o‘z aybini to‘liq tan olgan. Uning aytishicha, fuqaroni ishga joylashtirish masalasida tibbiyot birlashmasi boshlig‘i bilan kelishmagan va olingan mablag‘ni unga berish haqida ham gaplashmagan.
Chirchiq shahar sudi ayolni Jinoyat kodeksining tegishli moddalari bilan aybli deb topib, unga 2 yil 2 oy ozodlikni cheklash jazosini belgilagan. Shuningdek, u ikki yil davomida davlat va nodavlat tibbiyot muassasalarida bosh hamshira lavozimida ishlash huquqidan mahrum qilingan.