Chirchiqda 17 yoshli yigit Rossiyadan kelgan, gashish solingan jo‘natmani olayotganda ushlandi
Chirchiqda 17 yoshli o‘quvchi Rossiyadan yuborilgan va ichiga 852,2 gramm gashish yashirilgan jo‘natmani qabul qilib olayotganda ushlandi, deya xabar berdi Bojxona qo‘mitasi. Giyohvandlik vositasi to‘rtta konserva qutisiga joylangan, uning qora bozordagi bahosi qariyb 600 ming dollarga teng deb baholanmoqda.
Chirchiqda 17 yoshli yigit Rossiyadan kelgan, gashish solingan jo‘natmani olayotganda qo‘lga tushdi
Toshkent viloyatining Chirchiq shahrida 17 yoshli maktab o‘quvchisi Rossiyadan yuborilgan, ichida 852,2 gramm gashish bo‘lgan jo‘natmani qabul qilib olayotgan paytda ushlangani haqida O‘zbekiston Bojxona qo‘mitasi ma’lum qildi.
Mazkur tezkor tadbir Bojxona qo‘mitasining Kontrabandaga qarshi kurashish boshqarmasi tomonidan Davlat xavfsizlik xizmati va Ichki ishlar vazirligi tuzilmalari bilan hamkorlikda “xalqaro nazorat ostida yetkazib berish” amaliyoti doirasida amalga oshirildi.
Idora ma’lumotiga ko‘ra, 2009-yilda tug‘ilgan voyaga yetmagan shaxs Rossiyadan kelgan posilkani olayotgan vaqtda qo‘lga olingan.
Xolislar ishtirokida jo‘natma ochib ko‘rilganda, giyohvandlik moddasi to‘rtta konserva qutisi ichiga yashirilgani ma’lum bo‘ldi. Olingan gashishning umumiy og‘irligi 852,2 grammni tashkil etdi.
Keyinchalik o‘smirning yashash manzili ko‘zdan kechirilganda, huquq-tartibot organlari xodimlari elektron tarozi, kichik zip-paketlar va izolenta borligini ham aniqladi. Bojxona qo‘mitasiga ko‘ra, bu buyumlar giyohvandlik moddalarini qadoqlash va tarqatishda ishlatilgan bo‘lishi mumkin. Barcha ashyolar dalil sifatida olib qo‘yildi.
Qo‘mita bildirishicha, musodara qilingan gashish miqdori 60 mingdan ortiq dozaga teng, uning qora bozordagi qiymati esa qariyb 600 ming dollarga baholanmoqda.
Bojxona qo‘mitasi ota-onalarni farzandlari ijtimoiy tarmoqlarda kimlar bilan muloqot qilayotgani va bo‘sh vaqtlarini qanday o‘tkazayotganiga yanada e’tiborli bo‘lishga chaqirdi. Mazkur holat yuzasidan jinoyat ishi qo‘zg‘atildi.