ChatGPT yordamida bankni oʻmargan amerikalik 10 yilga qamaldi
Nebraska shtati sudi ChatGPT’dan foydalangan oʻgʻrini 121 oyga ozodlikdan mahrum qildi.
ChatGPT yordamida bankni oʻmargan amerikalik 10 yilga qamaldi
Nebraska shtati (AQSH) sudi Omaxa shahrida yashovchi 23 yoshli Deron Lyuis-Peynni qurol yordamida bank oʻmargani uchun 121 oyga ozodlikdan mahrum etdi, deb xabar berdi Nebraska okrugi prokuraturasi.
Idora maʼlumotlariga koʻra, 2026-yil 10-fevral kuni Lyuis-Peyn Omaxadagi i3Bank filialiga kirib, xodimlarga Llama Mini-Max toʻpponchasi bilan tahdid etib, pul talab qilgan. Natijada u taxminan 9175 dollar naqd pulni olib, voqea joyidan yashiringan. U pullarni savdo markazida sarflab yuborgan. Bosqinchining shaxsi videokuzatuv kameralari va uning yorqin rangli kiyimi tufayli aniqlangan.
Gumon qilinuvchi qoʻlga olish chogʻida oʻgʻirlangan pullarning bir qismini bank oʻrami bilan birga tashlab, qochishga urungan. Uning uyini tintuv qilish paytida politsiyachilar bankka kelgan avtomobilni va kiyimlarining asosiy qismini topgan. Tergovchilar bosqinchining telefonidan ChatGPT bilan yozishmalarni aniqlagan - muqaddam sudlangan bu shaxs politsiyaning tezkor chaqiriqlarga javob berish vaqti, shuningdek, toʻpponchani qismlarga ajratish va taʼmirlash usullari bilan qiziqqan. Politsiya oʻgʻirlangan pullarning bir qismini qaytarishga muvaffaq boʻlgan.
2025-yil avgust oyida bir amerikalik ChatGPT maslahati bilan uch oy davomida tuz oʻrniga bromid isteʼmol qilib, psixozni keltirib chiqargan zaharlanish ortidan majburiy davolanish uchun ruhiy kasalliklar shifoxonasiga yotqizilgan edi. 2025-yil oktabr oyida esa AQShda sinfdoshini dars vaqtida oʻldirish rejasini tuzishda ChatGPT’dan yordam soʻragan maktab oʻquvchisi hibsga olingan. Oʻsmir bu qilmishini tengdoshini hazil tariqasida qoʻrqitmoqchi boʻlgani bilan izohlagan.