Centrum Air Toshkentdan Haydarobodga toʻgʻridan-toʻgʻri reyslarni yoʻlga qoʻyadi

Centrum Air Toshkentdan Haydarobodga toʻgʻridan-toʻgʻri reyslarni yoʻlga qoʻyadi

Centrum Air aviakompaniyasi 28 sentyabrdan boshlab Toshkent va Haydarobod oʻrtasida toʻgʻridan-toʻgʻri muntazam reyslarni yoʻlga qoʻyadi. Ushbu yangi yoʻnalish boʻyicha parvozlar haftasiga ikki marta — dushanba va payshanba kunlari amalga oshiriladi. Bu haqda Oʻzbekiston Respublikasi Turizm qoʻmitasi xabar bermoqda.

Yangi aviayoʻnalish Oʻzbekiston va Hindiston oʻrtasidagi transport aloqalarini kengaytirish, shuningdek, ikki mamlakat oʻrtasidagi turistik almashinuvni rivojlantirish uchun qoʻshimcha imkoniyatlar yaratishga qaratilgan.

Toʻgʻridan-toʻgʻri reyslar Janubiy Hindistonning yirik shaharlaridan keluvchi sayyohlar uchun Toshkentga sayohat qilishni yanada qulaylashtiradi. Yangi yoʻnalishning ishga tushirilishi sayyohlar oqimining oʻsishiga va ishbilarmonlik aloqalarining rivojlanishiga xizmat qilishi kutilmoqda.

Haydarobod — Hindiston janubidagi yirik shahar va Telangana shtatining poytaxti hisoblanadi. U mamlakatning texnologik markazlaridan biri sifatida tanilgan boʻlib, undagi tarixiy meʼmorchilik zamonaviy ishbilarmonlik va IT-infratuzilma bilan uygʻunlashib ketgan.

Toshkent va Haydarobod oʻrtasida toʻgʻridan-toʻgʻri aviaaloqaning yoʻlga qoʻyilishi Oʻzbekiston va Hindiston oʻrtasidagi turistik, ishbilarmonlik hamda madaniy-gumanitar aloqalarni yanada rivojlantirishga xizmat qilishi kerak.