Buxoroning hunarmandchilik merosi Oʻzbekistonni YUNESKOning 2027 yildagi konferentsiyasi diqqat markaziga olib chiqmoqda
Oʻzbekistonning Buxoro shahri 2027 yilda YUNESKO Ijodkor shaharlar tarmogʻining 19-konferentsiyasiga mezbonlik qiladi. Buxoro biyennalesining qaytishi bilan bir qatorda oʻtkaziladigan ushbu tadbir Ijodkor shaharlar vakillari, madaniyat xodimlari va xalqaro ekspertlarni bir joyga jamlaydi hamda qadimiy Ipak yoʻli shahriga oʻzining anʼanaviy hunarmandchiligi va zamonaviy sanʼatini namoyish etish imkonini beradi.
Buxoroning hunarmandchilik merosi Oʻzbekistonni 2027 yilgi YUNESKO konferentsiyasi diqqat markaziga olib chiqmoqda
Buxoro 2027 yilda YUNESKOning Ijodkor shaharlar tarmogʻi yillik konferentsiyasiga mezbonlik qilishi belgilangan boʻlib, bu qadimiy Ipak yoʻli shahrini hunarmandchilik, madaniy almashinuv va ijodiy sanoatlarga bagʻishlangan xalqaro kun tartibining markaziga aylantiradi.
Konferentsiyaning 19-yigʻilishi YUNESKOning Ijodkor shaharlari vakillarini, jumladan, shahar hokimliklari mutasaddilari, sanʼatkorlar, madaniyat xodimlari va xalqaro ekspertlarni bir joyga jamlaydi.
Konferentsiyaga mezbonlik qilish tashabbusi Prezident Shavkat Mirziyoyev tomonidan 2025 yil 30 oktyabr kuni Samarqandda YUNESKO Bosh konferentsiyasining 43-ssiyasi ochilishida ilgari surilgan edi. Oʻzbekiston soʻnggi 40 yil ichida ilk bor YUNESKOning Parijdagi qarorgohidan tashqarida oʻtkazilgan ushbu sessiyaga mezbonlik qildi.
Buxoroning tanlanishi uning anʼanaviy hunarmandchilik markazi sifatidagi maqomini aks ettiradi. Shahar 1993 yilda YUNESKOning Umumjahon merosi roʻyxatiga kiritilgan, 2023 yilda esa «Hunarmandchilik va xalaq sanʼati» kategoriyasi boʻyicha Ijodkor shaharlar tarmogʻi aʼzosiga aylangan. Uning uzoq tarixga ega hunarmandchilik anʼanalariga zardoʻzlik, sopolchilik, zargarlik va yogʻoch oʻymakorligi kiradi.
Ushbu xalqaro tadbir 2027 yilning 3 sentyabridan 21 noyabrigacha ikkinchi bor oʻtkazilishi rejalashtirilgan Buxoro biyennalesi bilan bir vaqtda boʻlib oʻtadi. Tadbirga badiiy jihatdan Kulapat Yantrasast rahbarlik qiladi.
2025 yilda oʻtkazilgan ilk biyennale 10 hafta davomida 1,5 milliondan ortiq tashrif buyuruvchini jalb etdi va 70 dan ortiq zamonaviy sanʼat loyihalarini oʻz ichiga oldi. Uning dasturi xalqaro sanʼatkorlar va kuratorlarni mahalliy hunarmandlar bilan birlashtirib, anʼanaviy usullarni zamonaviy badiiy amaliyotlar bilan bogʻladi.
Tashkilotchilarning taʼkidlashicha, bu ikki tadbir madaniyat muassasalari, ijodkor mutaxassislar va shahar maʼmuriyatlari oʻrtasidagi hamkorlik uchun kengroq maydon yaratishi, shuningdek, xalqaro sheriklik va tajriba almashish uchun imkoniyatlar ochishi kutilmoqda.
2017 yilda tashkil etilgan Oʻzbekiston Madaniyat va sanʼatni rivojlantirish jamgʻarmasi (ACDF) mamlakat madaniy merosini ommalashtirish va zamonaviy sanʼat sohasini qoʻllab-quvvatlash yoʻlida faoliyat yuritadi. Jamgʻarma 40 dan ortiq xalqaro muassasalar, jumladan, Luvr, Uffitsi galereyasi, Britan muzeyi va Pekindagi Gugun saroy muzeyi bilan hamkorlik oʻrnatgan. Uning loyihalari 17 mamlakat boʻylab 5 milliondan ortiq tashrif buyuruvchini qamrab oldi.
2004 yilda tashkil etilgan YUNESKOning Ijodkor shaharlar tarmogʻi shaharlarni ijodkorlik va madaniy sanoatni oʻzlarining barqaror rivojlanish strategiyalariga integratsiya qilishga undaydi. Uning yillik konferentsiyasi aʼzo shaharlar oʻrtasida navbat bilan oʻtkaziladi hamda madaniy siyosat, shaharsozlik va xalqaro hamkorlik boʻyicha forum vazifasini oʻtaydi.
2026 yilgi konferentsiya Marokashning Es-Suveyra shahrida 25-27 noyabr kunlari oʻtkazilishi belgilangan. Uchrashuv «Shaharlarning integratsiyalashgan barqaror rivojlanishi uchun madaniy innovatsiyalar» mavzusiga bagʻishlanadi.