Buxoroda 14 kunlik chaqaloqning oshqozonidan to‘g‘nog‘ich olib tashlandi
Chaqaloq tanasiga tig‘ tegdirilmadi
Buxoroda 14 kunlik chaqaloqning oshqozonidan to‘g‘nog‘ich olib tashlandi
Buxoroda shifokorlar 14 kunlik chaqaloqning oshqozonidan to‘g‘nog‘ichni jarrohlik kesishisiz olib tashlashdi.
Buxoro viloyati bolalar ko‘p tarmoqli tibbiyot markazi shifokori Jo‘rabek Choriyevning ma’lum qilishicha, 14 kunlik chaqaloq tinimsiz qusish va bezovtalik alomatlari bilan shifoxonaga olib kelingan. Rentgen tekshiruvi natijasida chaqaloq oshqozonida yot jism borligi aniqlangan. Tibbiyot xodimlari maxsus endoskopik asboblar yordamida to‘g‘nog‘ichni hech qanday jarrohlik kesishsiz, qon ketishisiz olib tashlashgan. Amaliyot 10-15 daqiqa davom etgan.
Shifokorning aytishicha, hozir chaqaloqning ahvoli yaxshi, hayotiy ko‘rsatkichlari me’yorda — shu kuniyoq uyiga javob berilgan. Bolaning yaqinlari tibbiyot xodimlariga ko‘rsatilgan yordam uchun minnatdorlik bildirgan.
Mutaxassis ota-onalarni chaqaloqlar xavfsizligiga yanada e’tiborli bo‘lishga chaqirdi.
«Atrofidagi buyumlar, mayda narsalar bolalar uchun xavf tug‘dirishi mumkinligini unutmang!», — dedi Jo‘rabek Choriyev.