Buxoro viloyati hokimiga birinchi o‘rinbosar tayinlandi
U ATB “Agrobank” muammoli kreditlar bilan ishlash departamenti direktori vazifasida ishlab kelayotgan edi
Buxoro viloyati hokimining birinchi o‘rinbosari lavozimiga tayinlov amalga oshirildi.
Jamshid Sharopov Buxoro viloyati hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari – viloyat iqtisodiyot va moliya bosh boshqarmasi boshlig‘i etib tayinlandi.
Jamshid Sharopov 1984-yil 27-yanvarda G‘ijduvon tumanida tug‘ilgan. U 2005-yilda Buxoro davlat universitetini, 2009-yilda esa Toshkent davlat iqtisodiyot universitetini tamomlagan. Ma’lumoti bo‘yicha mutaxassisligi iqtisodchi.
Uning mehnat faoliyati 2002-yilda AT “Paxta Bank”ning Buxoro viloyati boshqarmasi bank jarayonlari bo‘limi iqtisodiy bo‘linmasi mutaxassisi lavozimidan boshlangan. Keyinchalik u ATB “Agrobank” Buxoro viloyati boshqarmasi boshlig‘i (2014-2020), O‘zbekiston Respublikasi Markaziy banki Buxoro viloyati bosh boshqarmasi boshlig‘i (2020-2021), Shofirkon tumani hokimi (2021-2023), ATB “Agrobank” agrosanoat majmuasi korxonalarini moliyalashtirish departamenti direktori o‘rinbosari (2023-2026) kabi lavozimlarda ishlagan.
U ushbu tayinlovga qadar ATB “Agrobank”ning muammoli kreditlar bilan ishlash departamenti direktori lavozimida faoliyat yuritgan.