Bundesver Latviyaga toʻrtta Eurofighter qiruvchisini joylashtirdi
Germaniya qurolli kuchlari - Bundesver 3-oktabr kuni Latviyada boʻlib oʻtadigan parlament saylovlari davrida havo hududi xavfsizligini taʼminlashga koʻmaklashish uchun mamlakatga toʻrtta Eurofighter qiruvchi samolyotini yubordi. Ular Latviyada bir haftadan sal koʻproq vaqt davomida joylashtiriladi.
Bundesver Latviyaga toʻrtta Eurofighter qiruvchisini joylashtirdi
DW xabariga koʻra, bu haqda Latviya Mudofaa vazirligi 24-sentabr kuni maʼlum qilgan. Germaniyaning Noyburg-an-der-Donau aviabazasida joylashgan 74-taktik aviatsiya eskadrasiga tegishli qiruvchilar Latviya markazidagi Liyelvarde harbiy aerodromiga koʻchirildi.
Samolyotlar NATOning birlashgan havo va raketa hujumidan mudofaa tizimini qoʻllab-quvvatlash vazifalarini bajaradi.
dpa agentligi yozishicha, Boltiqboʻyi mamlakatlari havo hududi bir necha bor buzilgani sabab Riga NATOdagi ittifoqchilaridan yordam soʻragan.
Latviya bosh vaziri Andris Kulbergs X ijtimoiy tarmogʻida Germaniyaga yordam berishga tayyorligi va yaqin hamkorligi uchun minnatdorlik bildirgan. U bu qadamni NATO hamjihatligi hamda Latviya havo hududi va aholi xavfsizligini himoya qilishga umumiy sodiqlikning amaliy ifodasi deb baholagan.
NATO Estoniya, Latviya va Litva 2004-yilda alyansga qoʻshilganidan beri uning shimoli-sharqiy qanotidagi havo hududini qoʻriqlab kelmoqda.
Rossiyaning Ukrainaga qarshi keng koʻlamli urushi boshlanganidan soʻng Boltiqboʻyi davlatlari havo hududiga uchuvchisiz uchish apparatlari bir necha bor kirib kelgan. Xabarda aytilishicha, avgust oyida NATO qiruvchilari Latviya havo hududini buzgan dronni urib tushirgan.
2026-yil dekabridan boshlab Germaniyaning Eurofighter samolyotlari NATOning Air Policing missiyasi doirasida Estoniya hududidan alyans havo hududini kuzatish vazifasiga yana uzoq muddatga kirishadi.
2027-yil martigacha Estoniya shimoli-gʻarbidagi Emari aviabazasida beshta Eurofighter qiruvchisi va ularning parvoz ekipajlari joylashtirilishi rejalashtirilgan.