“Bu men uchun eng yaxshi tug‘ilgan kun sovg‘asi bo‘lardi” — sobiq chempion UFC 333 turniridagi titul jangi haqida

“Bu men uchun eng yaxshi tug‘ilgan kun sovg‘asi bo‘lardi” — sobiq chempion UFC 333 turniridagi titul jangi haqida

UFC’ning o‘ta yengil vazn toifasidagi sobiq chempioni Shon O’Melli 24-oktyabr kuni Abu-Dabida bo‘lib o‘tadigan UFC 333 turnirining ikkinchi asosiy jangi (co-main event) haqida o‘z fikrlarini bildirdi. Ushbu bahsda amaldagi chempion Pyotr Yan hamda gruziyalik Merab Dvalishvili o‘rtasida uchinchi (trilogiya) to‘qnashuv bo‘lib o‘tadi (hozircha ularning o‘zaro hisobi 1:1).

O’Melli ushbu to‘qnashuvda rossiyalik jangchining g‘alabasiga umid qilmoqda. Chunki u Dvalishviliga ikki bor imkoniyatni boy bergan, Yanni esa 2022-yilda tengkurashlar ostida kechgan jangda mag‘lub etgan edi. Agar Dvalishvili chempionlik kamarni qaytarib olsa, O’Melli u bilan uchinchi bor kamar uchun jang qilish imkoniyati pasayadi. Yan g‘alaba qozonsa, amerikalik jangchi keyingi chempionlik jangi uchun asosiy da’vogarga aylanadi.

“Yan g‘alaba qozonsa zo‘r bo‘lardi. Agar Merab yutsa, men u bilan uchinchi jangni o‘tkazishni xohlardim, lekin muxlislar buni xohlashmaydi — hozir bu to‘qnashuv hech kimga qiziq emas. Shuning uchun Pyotrning g‘alabasi men uchun eng yaxshi tug‘ilgan kun sovg‘asi bo‘lar edi. U oxirgi jangda Merabni so‘nggi raundlarda sindira oldi, shu sababli hozir Yanning imkoniyatlarini yuqoriroq baholayman”, deydi Shon O’Melli.

Shuningdek, O’Mellining navbatdagi chempionlik jangiga chiqish imkoniyati nafaqat Yan – Dvalishvili bahsiga, balki 29-avgust kuni o‘tkaziladigan Umar Nurmagomedov va Song Yadong o‘rtasidagi jang natijasiga ham bog‘liq bo‘ladi.

Ma’lumot uchun, Pyotr Yan hamda Merab Dvalishvili o‘rtasidagi ilk bellashuv 2025-yil 11-mart kuni bo‘lib o‘tgan va unda gruziyalik jangchi hakamlar qaroriga ko‘ra g‘alaba qozongan edi. Ikkinchi jang 2025-yilning 7-dekabr kuni o‘tkazilgan va unda rossiyalik jangchining qo‘li baland kelgan edi.