Bruklindagi binoda yuz bergan yongʻinda olti kishi halok boʻldi va boshqalar jarohat oldi
Olov yuzaga kelishi sababi hozircha aniq emas, voqea joyiga 230 nafar yongʻin oʻchirish va shoshilinch tibbiy yordam xodimlari yetib borgan.
Nyu-York shahrining Bruklin tumanidagi turar joy binosida yirik yongʻin chiqishi oqibatida olti kishi halok boʻldi, deb xabar berdi rasmiylar.
Nyu-York shahri yongʻin xavfsizligi xizmati (FDNY) AQSh OAVlariga maʼlum qilishicha, payshanba kuni ertalab sodir boʻlgan yongʻinda yana yetti kishi jarohat olgan.
BBC’ning AQShdagi hamkori CBS News koʻrib chiqqan bayonotda FDNY mahalliy vaqt bilan soat 01:40 larda (Grinvich boʻyicha 06:40) Sanset-Park yaqinidagi voqea joyiga 230 dan ortiq yongʻin oʻchiruvchi va shoshilinch tibbiy yordam xodimlari yuborilganini maʼlum qildi.
Yongʻin sabablari hozircha nomaʼlum.
Hodisa joyida litiy-ionli batareya boʻlgani sababli xavfli moddalar boʻyicha mutaxassislar guruhi ham yuborilgan, biroq uning yongʻinga aloqadorligi yoki yoʻqligi hozircha aniq emas.
Xabar qilinishicha, qutqaruvchilar yetib kelganda alanga binoning birinchi va ikkinchi qavatlariga tarqalib boʻlgan.
Halok boʻlganlarning toʻrttasining jasadi bino ichidan topilgan. Yana ikki kishi ogʻir ahvolda topilib, keyinchalik vafot etgan. AQSh OAV xabarlarida ular shifoxonada yoki u yerga olib ketilayotganda vafot etgani haqida turli maʼlumotlar berilgan.
Omon qolgan yetti kishining jarohatlari yengildan ogʻirgacha ekani aytilmoqda.