Britaniyalik reper Yung Filly kelasi yilning iyun oyida Avstraliyada zoʻrlash boʻyicha qayta sud qilinadi
Andres Felipe Valensiya Barriyentos iyul oyida bir nechta jinsiy jinoyatlarda aybsiz deb topilgan edi, biroq hakamlar hayʼati uchta zoʻrlash ayblovi boʻyicha bir qarorga kela olmadi.
Britaniyalik reper Yung Filly avvalgi sud jarayonida hakamlar hayʼati bir qarorga kela olmaganidan keyin, kelasi yilning iyun oyida Avstraliyada zoʻrlash ayblovi boʻyicha qayta sud qilinadigan boʻldi.
Iyul oyida haqiqiy ismi Andres Felipe Valensiya Barriyentos boʻlgan 31 yoshli reper hakamlar hayʼati tomonidan uchta zoʻrlash, bitta hujum qilish va bitta boʻgʻish ayblovlari boʻyicha oqlangan edi, biroq ikkita tan jarohati yetkazish jinoyatida aybdor deb topilgandi. Hakamlar hayʼati yana uchta zoʻrlash ayblovi boʻyicha yakuniy qarorga kela olmagan.
Oʻsha paytda 20 yoshda boʻlgan muxlisa qizning taʼkidlashicha, Barriyentos 2024 yilda Gʻarbiy Avstraliyaning Pert shahridagi kontsertdan soʻng, oʻzining mehmonxona xonasida uni bir necha bor zoʻrlagan va unga hujum qilgan.
Sudda avvalroq Barriyentos va ayol oʻrtasida jinsiy aloqa oʻzaro rozilik asosida boshlangani, biroq keyinchalik u zoʻravonlik tusini olgani va erkak toʻxtamagani haqidagi koʻrsatmalar tinglangan edi.
Juma kuni Pert okrug sudi qayta sud jarayoni boshlanadigan sanani 15 iyun deb belgiladi. Sud sakkiz kun davom etishi kutilmoqda.
Barriyentos sud majlisida shaxsan ishtirok etishi shart emas edi. Sud uni garov evaziga ozod qilish shartlari asosida Avstraliyani tark etishiga ruxsat berganidan keyin, u Buyuk Britaniyaga qaytgani maʼlum qilingan.
Iyul oyida chiqarilgan ikkita tan jarohati yetkazish boʻyicha ayblov hukmi qayta sud jarayonidan keyin eʼlon qilinadi.
Kolumbiyada tugʻilgan va Buyuk Britaniyada ulgʻaygan Barriyentos YouTube'dagi «Beta Squad» jamoasi bilan olib borgan faoliyati orqali tanilgan.
U shuningdek, Channel 4 telekanalidagi «Bake Off» koʻrsatuvining mashhurlar sonida ishtirok etgan va BBC Three dasturlarini olib borgan.