Britaniya bosh vaziri o‘zini Tramp apparati rahbari deb tanishtirgan shaxs bilan yozishma olib bordi

Britaniyaning yangi bosh vaziri Endi Byornem AQSH prezidenti Donald Trampning apparat rahbari ekanligini da'vo qilgan shaxs bilan yozishmalar olib borgan. Bu haqda Politico gazetasi manbalarga tayanib xabar berdi.

Manbalarning ma'lumotiga ko'ra, Byornem Oq uy ma'muriyati rahbari Syuzi Uayls deb tanishtirgan shaxs bilan muloqot qilgan. Bosh vazir bu shaxsning haqiqiy Uayls emasligidan faqat ma'lum vaqt o'tgach shubhalana boshlagan.

Dauning-strit ushbu hodisaga javoban: "Biz milliy xavfsizlikka oid masalalarga izoh bermaymiz", deya bayonot berdi.

Yozishmalarning qancha vaqt davom etgani va ular qanday masalalarga taalluqli bo'lgani hozircha noma'lum. Gazeta manbalari buni ahamiyatsiz bir nechta xabarlar almashinuvi deb ta'riflamoqda.

Britaniyaning Vashingtondagi elchixonasi ushbu hodisadan xavotirda ekanligini bildirib, masalani Oq uyda ko'targan. Uaylsning telefoniga hakerlar hujum qilgan bo'lishi mumkinligi taxmin qilingan, ammo AQSH hukumati bu ma'lumotni rad etgan.

Qayd etish joizki, 2025-yilda senatorlar, gubernatorlar va AQSH biznes vakillari ham o'zini Tramp apparati rahbari deb da'vo qilgan shaxsdan xabarlar va telefon qo'ng'iroqlarini qabul qilgan edi. Shundan so'ng Oq uy va Federal qidiruv byurosi tergov boshlagan. O'shanda Uayls hamkasblariga uning telefon kontaktlariga buzib kirishganini aytgan.