Bo‘stonliqqa dam olish kunlari qo‘shimcha avtobuslar qo‘yiladi
Bo‘stonliqdagi sayyohlik maskanlariga olib boruvchi transportlar bayram kunlari ertaroq ishlab, kechgacha uzaytirilgan grafikda qatnaydi
Bo‘stonliqqa dam olish kunlari qo‘shimcha avtobuslar qatnovi yo‘lga qo‘yiladi
Turizm qo‘mitasining xabar berishicha, dam olish va bayram kunlari Bo‘stonliq tumanidagi sayyohlik maskanlariga borish uchun qo‘shimcha transport qatnovlari tashkil etiladi.
"Chinorkent temir yo‘l bekati – Beldersoy" yo‘nalishida 324M va 325M raqamli mikroavtobuslar Amirsoy va Chimyon orqali harakatlanadi. Oddiy kunlarda bu yo‘nalishlarda 20 ta mikroavtobus soat 6:00 dan 18:30 gacha har 15 daqiqada qatnaydi va kuniga jami 86 ta qatnovni amalga oshiradi.
Bayram va qo‘shimcha dam olish kunlarida esa harakat soat 5:30 dan boshlanadi. Mikroavtobuslar har 10 daqiqada qatnaydi. 324M yo‘nalishida qatnovlar 22:06 gacha, 325M yo‘nalishida esa 22:00 gacha davom etadi.
Qo‘shimcha dam olish kunlarida 324M yo‘nalishida mikroavtobuslar soni 15 tagacha, 325M yo‘nalishida esa 16 tagacha oshiriladi. Bu esa kunlik qatnovlar sonini 158 taga yetkazadi.
Shu bilan birga, Toshkent–Bo‘stonliq yo‘nalishida 1226-raqamli "Mashinasozlar metro bekati – Xumson qo‘rg‘oni (Chorvoq)" avtobus yo‘nalishida muntazam 3 ta avtobus ishlaydi. Dam olish va bayram kunlarida yo‘lovchilar oqimiga qarab, ushbu yo‘nalishga zaxiradan yana 1 ta avtobus qo‘shiladi. 324M va 325M mikroavtobus yo‘nalishlari Chinorkent temir yo‘l bekatidan Beldersoygacha Amirsoy va Chimyon orqali harakatlanadi.