Boltiqboʻyi davlatlarida kuchli boʻron kuzatildi
Riga, Vilnyus va Tallinn koʻchalarini suv bosgan. Koʻpchilik daraxtlar qulashidan jabrlangan. Latviya va Litvada ikki kishi halok boʻlgan.
22-23-avgust kunlari Boltiqboʻyi davlatlari – Latviya, Litva va Estoniya, shuningdek, Polsha va Belarus hududlarida kuchli "Priska" sikloni hukm surdi. Ushbu boʻron kuchli yomgʻir va soniyasiga 30 metrdan yuqori tezlikda esgan shamollar bilan kechib, kamida ikki kishining hayotiga zomin boʻldi. Qurbonlardan biri Litvaning shimoli-sharqidagi Anikshay tumanida daraxt qulashi oqibatida halok boʻlgan boʻlsa, Latviyaning Yelgava shahrida yana bir kishi qulagan bino xarobalari ostida qolib ketgan.
Latviyada 14 kishi tibbiy yordamga murojaat qilgan, ularning baʼzilarining jarohatlari jiddiy ekanligi maʼlum qilingan. Jabrlanganlarning aksariyati daraxtlar yoki ularning shoxlari qulashi natijasida jarohat olgan. Baʼzi holatlarda odamlar ustiga daraxt qulagan avtomobillar ichida qamalib qolgan. Riga aeroporti reyslarning kechikishi mumkinligidan ogohlantirib, yoʻlovchilarga parvozlar haqidagi maʼlumotlarni doimiy kuzatib borishni tavsiya etgan.
Litvadagi qutqaruv xizmatlari ham koʻplab joylarda daraxtlar qulashi va buning natijasida bir kishining jarohatlangani haqida xabar bergan.
Boʻron elektr taʼminotida keng koʻlamli uzilishlarga sabab boʻldi, bunga asosan daraxtlarning elektr uzatish liniyalariga qulashi sabab boʻlgan. Latviyada 250 mingdan ortiq uy xoʻjaligi elektrsiz qolgan, Litvada esa bu raqam 150 mingdan oshgan. Estoniyada shanba oqshomida elektrdan uzilgan uy xoʻjaliklari soni qariyb 3,5 mingta boʻlgan boʻlsa, yakshanba tongiga kelib bu koʻrsatkich 2,6 mingtagacha kamaygan. Polshada 145 mingdan ortiq xonadonda elektr taʼminoti uzilgan, Belarusda esa 650 dan ortiq aholi punktida uzilishlar qayd etilgan.
Bundan tashqari, Latviyada LMT va Tele2 mobil operatorlarining ayrim mijozlari aloqadagi muammolardan shikoyat qilishgan.
Latviya, Litva va Estoniya shaharlarida koʻchalar suv ostida qolgan. Estoniyadan olingan maʼlumotlarga koʻra, bir kun ichida 50-70 millimetr yogʻin tushgan, ayrim hududlarda esa bu miqdor 90 millimetrga yetgan. Kuchli yomgʻir tufayli baʼzi daryolarda, jumladan, Riga shahridan oqib oʻtuvchi Daugava daryosida suv sathi koʻtarilgan. Shaharda transport harakati, jumladan, avtobuslarning harakati qiyinlashgan, favqulodda xizmatlar xodimlari yoʻllardagi suvni nasoslar yordamida chiqarib tashlashgan. Shuningdek, koʻplab binolarning yertoʻlalari va koʻp qavatli uylarning birinchi qavatlarini suv bosgan.
23-avgust kuni ham hududda shamol haqidagi ogohlantirish oʻz kuchini saqlab qolgan.