Bollivud yulduzlari menejerining 2020 yildagi oʻlim ishi nima uchun qayta ochildi

Bollivud yulduzlari menejerining 2020 yildagi oʻlim ishi nima uchun qayta ochildi?

Disha Salian Bollivud aktyori Sushant Singh Rajputning menejeri edi.

2020 yil 4 iyun kuni, Hindiston boʻylab Kovid-19 ning halokatli toʻlqini tarqalayotgan bir paytda, yulduzlar menejeri Disha Salian otasi Satish Saliandan sayohat qilish u uchun xavfsiz yoki xavfsiz emasligini bilish uchun politsiyaning ishonch telefoniga qoʻngʻiroq qilishni soʻradi.

U suratga tushishi kerak boʻlgan reklama kampaniyasidan juda hayajonda edi va ota-onasiga boʻnak toʻlovi sifatida olgan chekining suratini koʻrsatdi.

Uydan chiqayotib, ota-onasiga ikki kundan keyin qaytishini aytdi.

Bu Salianlar oilasi oʻzlarining 28 yoshli qizlarini oxirgi marta tirik koʻrishlari edi.

8 va 9 iyun kunlari yarim tunda Satish Salian politsiya tomonidan shifoxonaga chaqirildi va u yerda unga yagona farzandi vafot etgani aytildi.

Politsiyaning maʼlum qilishicha, u mamlakat gʻarbidagi Mumbay shahridagi binoning 12-qavatidan yiqilib tushgan.

Dishaning shifoxonadagi doʻstlari uning spirtli ichimlik ichganini va tasodifan yiqilib tushganini aytishdi.

Keyinroq politsiya tergov natijasida uning oʻlimi oʻz joniga qasd qilish ekanini aniqlaganini maʼlum qildi.

Biroq shu oy boshida Bombey Oliy sudi federal politsiyaga — Markaziy tergov byurosiga (CBI) — ishni qayta ochishni va Dishaning oʻlimini qayta tergov qilishni buyurdi.

Sud qarori oʻtgan yili Satish Salian tomonidan berilgan arizadan soʻng qabul qilindi. U boshidan beri qizining oʻlimi oʻz joniga qasd qilish ham, baxtsiz hodisa ham emasligini taʼkidlab, u guruh boʻlib zoʻrlangani va oʻldirilganini daʼvo qilib kelgan.

Uning baʼzi yuqori martabali politsiya xodimlari dalillarni yoʻq qilgani va jinoyatga aloqador boʻlgan vazirlar hamda nufuzli siyosatchilarni himoya qilish uchun soxta oʻz joniga qasd qilish talqinini yaratgani haqidagi daʼvolari bu voqeani soʻnggi yillarda Hindistonda eng koʻp muhokama qilingan oʻlim holatlaridan biriga aylantirdi.

Sudyalar "kichik sud jarayoni" oʻtkazmayotganliklarini taʼkidladilar, ammo "politsiya tomonidan olib borilgan tergov javoblardan koʻra koʻproq savollar tugʻdirayotganini" aytishdi.

Ular politsiya hujjatlaridagi tushuntirib boʻlmaydigan kechikishni, jasad tushgan joyda qon yoʻqligini qayd etishdi va murdani yorib koʻrish hisobotida tasvirlangan jarohatlar yiqilishga mos kelmasligini aytishdi.

"Buni qabul qilish biz uchun qiyin", deb yozgan ular.

Sudning eng jiddiy tanqidlaridan biri politsiya bu voqeani faqat shubhali yoki gʻayritabiiy oʻlim sifatida baholagani va FIR (Birinchi axborot hisoboti) — politsiya jinoyat haqida maʼlumot olganda tayyorlashi kerak boʻlgan hujjatni rasmiylashtirmagani boʻldi.

Satish Salianning daʼvolari hozircha daʼvo boʻlib qolmoqda, biroq ular CBI tomonidan yangi tergov boshlanishiga olib keldi va idora oʻtgan haftada uning yozma shikoyati asosida FIR roʻyxatdan oʻtkazdi.

Satish Salianning daʼvolarini umumlashtirib, sud qarorida aytilishicha, oʻlimi vaqtida Disha yulduzlarni boshqarish bilan shugʻullanuvchi "Kwan Entertainment" kompaniyasida ishlagan va Bollivud aktyori Sushant Singh Rajputning vakili boʻlgan.

"U nufuzli shaxslarning baʼzi nomaqbul faoliyatlari haqida bilib qolgan. U bu maʼlumotni Rajputga bergan, u esa soddalik qilib buni boshqalarga oshkor qilgan. Oxir-oqibat bu maʼlumot oʻsha odamlarga yetib borgan va uni ovozini oʻchirish uchun oʻldirishgan", deb qoʻshimcha qilinadi unda.

"Bu juda dahshatli xabar. Dishaning oilasi va doʻstlariga chuqur hamdardlik bildiraman. Joying jannatda boʻlsin", deb yozgan edi u.

Boshida Dishaning oʻlimiga kam eʼtibor qaratildi, toki bir hafta oʻtmay Rajputning oʻzi uyida oʻlik holda topilgunga qadar.

Politsiya uning oʻlimini ham oʻz joniga qasd qilish deb baholadi va uning ruhiy salomatligida muammolar boʻlgani hamda davolanayotganini aytdi.

Ammo bir necha hafta oʻtgach, Rajputning otasi uni oʻz joniga qasd qilishga undaganlikda ayblaganidan keyin uning aktrisa sevgilisi Riya Chakraborti hibsga olindi. U shuningdek, oʻgʻlining ruhiy salomatligida hech qanday muammo boʻlmaganini inkor etdi.

Jamoatchilik gʻazabidan soʻng, Sushantning ishi ham CBI ga topshirildi, u oʻtgan yili ishni yopib, uning haqiqatan ham oʻz joniga qasd qilish natijasida vafot etganini va Chakrabortining ham, uning oilasining ham bu oʻlimda hech qanday roli yoʻqligini maʼlum qildi.

Satish Salian CBI ga topshirgan FIR hujjatida Disha va Rajputning oʻlimi oʻzaro bogʻliqligini daʼvo qilgan.

Uning aytishicha, Disha aktyor bilan sobiq vazir va boshqalar ishtirokidagi "noqonuniy narkotik savdosi, bolalarga nisbatan zoʻravonlik va boshqa noqonuniy faoliyatlarga oid fosh qiluvchi va nomaqbul maʼlumotlarni" baham koʻrgan va ikkalasi buni oshkor qilish uchun matbuot anjumani oʻtkazishni rejalashtirgan.

"Buning oldini olish va aloqador shaxslarni himoya qilish uchun puxta rejalashtirilgan jinoiy til biriktirish amalga oshirilgan. Qurbon guruh boʻlib zoʻrlangan va oʻldirilgan, shundan soʻng jinoyatlarni yashirish va ayblanuvchilarni himoya qilish uchun dalillar yoʻq qilingan/soxtalashtirilgan va oʻz joniga qasd qilish haqida soxta hikoya yaratilgan".

Sud oʻz qarorida FIR ni roʻyxatdan oʻtkazish "hech kimning aybdorligini anglatmasligini" va tergovchi "ularga nisbatan asosli shubha tugʻdiradigan yetarli asoslar" topmaguncha hech kim ayblanuvchi sifatida koʻrilmasligini taʼkidladi.

Ammo FIR da shtatning baʼzi yetakchi siyosatchilari, politsiya xodimlari va Bollivud aktyorlarining nomlari tilga olingani sababli, siyosiy hokimiyatni suiisteʼmol qilish, inkor etishlar va siyosiy oʻch olish daʼvolari fonida bu ish Hindistonda bosh mavzuga aylandi.

Qizi uchun adolat izlab olti yil umrini sarflagan Satish Salian, sud uning oʻlimi boʻyicha yangi tergov oʻtkazishga buyruq berganidan keyin "biroz taskin" topganini aytadi.

Disha, dedi u Bi-bi-siga, "juda aqlli edi, oʻqishlari yaxshi edi va koʻp kitob oʻqirdi. Uning qalbi toza va juda yordamsevar edi. U bizning yagona farzandimiz edi va bizni juda yaxshi koʻrardi".

Uning aytishicha, rafiqasi uning fojiali oʻlimini qabul qila olmay, depressiyaga tushib qolgan.

"Qizimga ozor berganlarga oʻlim jazosini xohlayman. Unga azob berganlar ham azobli oʻlim topishi kerak. Men uchun Disha uchun adolat mana shunday koʻrinishda boʻladi", deydi u.