Bolalarga nisbatan jinsiy zoʻravonlik uchun umrbodlik qamoq jazosi toʻgʻrisidagi qonun loyihasi ikkinchi oʻqishda maʼqullandi
Bolalarga nisbatan jinsiy zoʻravonlik uchun umrbod qamoq jazosi toʻgʻrisidagi qonun loyihasi ikkinchi oʻqishda maʼqullandi
Oʻzbekistonda bolalarga qarshi jinoyatlar uchun javobgarlikni sezilarli darajada kuchaytirish rejalashtirilmoqda. Oliy Majlis Qonunchilik palatasi deputatlari ikkinchi oʻqishda zoʻravonlikdan jabr koʻrgan voyaga yetmaganlar uchun qattiqroq jazo choralari va qoʻshimcha kafolatlarni nazarda tutuvchi qonun loyihasini qabul qildilar.
Eng qattiq jazo chorasi 14 yoshga toʻlmagan bolalarni zoʻrlash va jinsiy ehtiyojni gʻayritabiiy shaklda zoʻrlik ishlatib qondirish uchun taklif etilmoqda. Bunday qilmishlar uchun 25 yilgacha ozodlikdan mahrum qilish yoki umrbod ozodlikdan mahrum qilish jazosi tayinlanishi mumkin.
Bolaning oʻlimiga qasddan sabab boʻlgan jinoyatlar uchun ham alohida cheklovlar oʻrnatish kutilmoqda. Bunday hollarda shartli hukm qilish va jazodan muddatidan ilgari shartli ozod qilish imkoniyatini istisno etish taklif qilinmoqda. Bundan tashqari, bolalarning jinsiy erkinligiga qarshi bir qator jinoyatlar boʻyicha javobgarlikka tortish va jazoni ijro etish muddatlarini qoʻllamaslik rejalashtirilgan.
Jazolarning kuchaytirilishi boshqa jinoyatlarga ham tegishli boʻladi. Voyaga yetmagan shaxsga qasddan badanga ogʻir yoki oʻrtacha ogʻirlikdagi shikast yetkazishni, shuningdek, bir guruh shaxslar tomonidan 16 yoshga toʻlmagan bolaga nisbatan uyatsiz-buzuq harakatlar sodir etishni ogʻirlashtiruvchi holat deb hisoblash taklif etilmoqda. Voyaga yetmaganlarni gʻayriijtimoiy xulq-atvorga jalb qilganlik, shuningdek, bolalarni tarbiyalash borasidagi majburiyatlarni bajarmaganlik uchun ham qattiqroq choralar nazarda tutilgan.
Oʻzgartirishlarning alohida bloki zoʻravonlik qurboni boʻlgan yoki jinoyat guvohiga aylangan bolalar bilan muomala qilish tartibiga taalluqlidir.
Voyaga yetmagan shaxsni soʻroq qilishni majburiy tartibda videotasvirga olish rejalashtirilmoqda. Bolalar ishtirokidagi yuzlashtirishlar maxsus qoidalar asosida oʻtkaziladi. Shuningdek, vasiylik va homiylik organlari vakilining ishtiroki ham nazarda tutilmoqda.
Zoʻravonlikdan jabr koʻrgan yoki uning guvohi boʻlgan bolalar uchun davlat hisobidan yuridik yordam koʻrsatilishi koʻzda tutilgan. Qonun loyihasida uni taqdim etish tartibi alohida aniqlashtirilgan.
Oʻzgartirishlar maktablarga ham daxl qiladi. Agar oʻqituvchi bolaga nisbatan zoʻravonlik ishlatsa, bu ish beruvchining tashabbusi bilan ishdan boʻshatish uchun asos boʻladi.
Bundan tashqari, bolalar oʻrtasida ularning sogʻligʻiga zarar yetkazishi mumkin boʻlgan maʼlumotlarni tarqatganlik, shuningdek, bolalar masalalari boʻyicha komissiyalar qarorlarini bajarmaganlik yoki ularning bajarilishiga toʻsqinlik qilganlik uchun javobgarlik joriy etilmoqda.
Qonun loyihasi deputatlar, mutaxassislar va jamoatchilik vakillari bilan muhokamalardan soʻng takomillashtirildi. Muhokama davomida kelib tushgan takliflarning bir qismi hujjatning yangi tahririga kiritildi.
Endilikda qonun loyihasi kuchga kirishi uchun qolgan bosqichlardan oʻtishi kerak.
Avvalroq "Milliy tiklanish" partiyasi yetakchisi Alisher Qodirov Oʻzbekistonda bolalar qotillari va voyaga yetmaganlarga nisbatan jinsiy jinoyatlar sodir etgan shaxslarga nisbatan oʻlim jazosini qaytarishni yoqlab chiqqan edi.