BMW uzaytirilgan iX3 krossoverini taqdim etdi
BMW Xitoy bozori uchun moʻljallangan uzaytirilgan iX3 krossoverining narxlarini eʼlon qildi.
BMW kompaniyasi uzaytirilgan iX3 krossoverini taqdim etdi.
Germaniyaning BMW avtomobil ishlab chiqaruvchisi Chendu avtosalonida Xitoy bozori uchun maxsus yaratilgan iX3 krossoverining uzunroq versiyasini namoyish etdi. CarNewsChina nashrining xabar berishicha, ushbu avtomobil uch xil komplektatsiyada 269 900 yuandan 339 900 yuangacha narxda sotuvga chiqarilgan (2026-yil 21-avgust holatiga koʻra 476 million soʻmdan 600 million soʻmgacha).
"Xitoycha" BMW iX3 ning Yevropa versiyasidan asosiy farqi gʻildirak bazasining uzaytirilganligi (3 metrdan ortiq) va mahalliy dasturiy taʼminot bilan jihozlanganligidir. Tashqi koʻrinishidan modellar deyarli bir xil. Uzaytirilgan krossover tor "burun teshiklari"ga ega soxta radiator panjarasi, katta orqa diffuzor, yarim yashirin eshik tutqichlari va alohida orqa chiroqlar bilan jihozlangan.
Avtomobil salonida jismoniy tugmalar soni minimal darajaga keltirilgan, asboblar paneli vazifasini esa old oyna boʻylab toʻliq joylashgan uzunchoq ekran bajaradi. Shuningdek, avtomobil gʻayrioddiy shakldagi ulkan multimedia tizimi displeyi bilan jihozlangan boʻlib, u haydovchi tomoniga biroz qiyaroq oʻrnatilgan.
Xitoy uchun moʻljallangan krossoverning bazaviy versiyasi 265 ot kuchiga ega bitta elektromotor bilan jihozlangan. Bunday BMW iX3 100 km/soat tezlikka 6,8 soniyada erisha oladi. Bir quvvatlanishda bosib oʻtadigan masofasi 630 km ni tashkil etadi.
Shuningdek, modelning umumiy quvvati 374 ot kuchiga ega ikkita elektr dvigatelli modifikatsiyasi ham mavjud. Bir quvvatlanish bilan avtomobil qariyb 700 km masofani bosib oʻtishi mumkin. Uning 100 km/soatgacha tezlanishi 5,6 soniyani talab etadi. Krossoverning top versiyasi 469 ot kuchi quvvatiga ega. Bir quvvatlanishda avtomobil 900 kmgacha masofani bosib oʻta oladi.