BMT Bosh Assambleyasi uchta yangi xalqaro kunni eʼlon qildi
BMT Qozogʻiston, Tojikiston va Suriya tashabbusi bilan uchta yangi xalqaro kunni taʼsis etdi.
BMT Bosh Assambleyasi uchta yangi xalqaro kunni joriy etdi.
Qozogʻistonning taklifi bilan 22-aprel Xalqaro sayyorani koʻkalamzorlashtirish kuni, Tojikistonning tashabbusi bilan esa 31-avgust Xalqaro xavfsiz, himoyalangan va ishonchli sunʼiy intellekt kuni deb belgilandi. Birinchi rezolyutsiyani 140 davlat, ikkinchisini esa 144 davlat qoʻllab-quvvatladi; AQSH har ikkisiga ham qarshi ovoz berdi.
Bundan tashqari, ovoz berishsiz, Suriya taklifiga koʻra, 19-dekabr Bedarak yoʻqolganlarni izlash bilan shugʻullanuvchi ayollar xizmatlarini eʼtirof etish xalqaro kuni sifatida taʼsis etildi.
Ayrim mamlakatlar yangi sanalarni olqishlagan boʻlsa-da, Kanada, Yangi Zelandiya, Avstraliya, Argentina va Meksika bunday kunlar sonining koʻpayib borayotgani, ularning bir-birini takrorlash ehtimoli va BMTga qoʻshimcha yuklama tushishidan xavotir bildirdi. AQSH vakili ham ushbu tashabbuslarni tanqid qilib, yangi xalqaro kunlarni "isrofgarchilik" deb atadi.
BMT Bosh Assambleyasi tomonidan doimiy ravishda toʻldirib boriladigan xalqaro kunlar roʻyxati hozirda 111 taga yetdi. Bu kunlar BMT Bosh Assambleyasi qarorlari bilan muhim tarixiy voqealar va inson hayotining muhim jihatlarini taʼkidlash maqsadida taʼsis etiladi. Aʼzo davlatlar kunni eʼlon qilish tashabbusi bilan chiqishi mumkin, rezolyutsiya esa konsensus asosida qabul qilinadi. Shu sababli roʻyxatga deyarli har yili yangi sanalar qoʻshiladi.