«Biz hali tugatganimiz yoʻq». Oʻzbekiston Markaziy banki inflyatsiya 5 foizga yetgunga qadar qatʼiy sharoitlarni saqlab qoladi
Oʻzbekistonda inflyatsiya 6,2% gacha pasaydi, biroq Markaziy bank hozircha siyosatni yumshatishga oʻtishga tayyor emas. Regulyator rahbari Timur Ishmetov qatʼiy pul-kredit sharoitlari barqaror dezinflyatsiyaga erishilgunga va 5% lik maqsadli koʻrsatkichga yetgunga qadar saqlanib qolishini maʼlum qildi.
«Biz hali tugatganimiz yoʻq». Oʻzbekiston MB inflyatsiya 5% ga yetgunga qadar qattiq sharoitlarni saqlab qoladi
Oʻzbekiston Markaziy banki inflyatsiyaning pasayishi barqaror tus olgunga va koʻrsatkich maqsadli 5% ga yaqinlashgunga qadar qattiq pul-kredit sharoitlarini ushlab turishni rejalashtirmoqda.
Uning soʻzlariga koʻra, Oʻzbekistonda inflyatsiya 2018 yildagi taxminan 20% va ikki yil oldingi qariyb 10% dan hozirgi vaqtda 6,2% gacha tushdi.
Markaziy bank 2026 yil yakunlari boʻyicha inflyatsiya oʻrtacha qariyb 6,5% ni tashkil etishini, keyingi yilda esa maqsadli 5% gacha pasayishini kutmoqda.
«Bu sezilarli progress, lekin biz hali tugatganimiz yoʻq. Ushbu maqsadga erishish pul-kredit siyosatining asosiy ustuvor yoʻnalishi boʻlib qoladi va iqtisodiyotga boʻlgan ishonchni hamda barqaror uzoq muddatli oʻsishni saqlab qolish uchun printsipial ahamiyatga ega boʻladi», — dedi Timur Ishmetov.
Markaziy bank asosiy stavkani yillik 14% darajasida saqlab qolmoqda. Regulyator rahbarining soʻzlariga koʻra, MB dezinflyatsiya mustahkamlangunga qadar pul-kredit sharoitlarini yumshatish niyatida emas.
«Biz asosiy stavkani 14% darajasida saqlab qolmoqdamiz va dezinflyatsiya barqaror tus olgunga hamda maqsadimizga erishgunimizga qadar pul-kredit sharoitlarini qattiq ushlab turish niyatidamiz», — dedi u.
Ishmetov, shuningdek, Oʻzbekiston iqtisodiyoti 2026 yilning birinchi yarmida 8,5% ga oʻsganini maʼlum qildi. U yuqori oʻsish surʼatlarini davom etayotgan investitsiyalar, yosh aholining koʻpayishi va amalga oshirilayotgan iqtisodiy islohotlar bilan bogʻladi.
Shu bilan birga, MB rahbari taʼkidlaganidek, tezkor oʻsish va iqtisodiyotning yanada ochilishi uning tashqi shoklarga nisbatan bardoshliligiga boʻlgan talablarni oshiradi.
«Bunday surʼatlar bilan oʻsayotgan va bunday surʼatlar bilan ochilayotgan iqtisodiyot oʻzi yaratmagan shoklarni oʻziga singdira olishga qodir boʻlishi kerak. Aynan shu yerda zaxiralarni boshqarish birinchi planga chiqadi», — dedi Markaziy bank raisi.
Bundan oldin oʻz chiqishida Timur Ishmetov Oʻzbekistonning xalqaro zaxiralari 1 sentyabr holatiga koʻra 72 mlrd dollardan oshganini va bir yildan ortiq vaqtdagi importni qoplashini maʼlum qilgan edi. MB ularni aktivlar sinflari, valyutalar va kontragentlar boʻyicha diversifikatsiya qilishni davom ettirish niyatida.
Ishmetov ishtirokchilarni oltin, dollar va zaxiralarni diversifikatsiya qilish bilan bogʻliq xavf-xatarlarni ochiq muhokama qilishga chaqirdi.
16 sentyabr kuni Markaziy bank boshqaruvi asosiy stavkani yillik 14% darajasida saqlab qolishga qaror qildi. Inflyatsiyaning pasayishi va iqtisodiyotda yanada muvozanatli dinamika belgilari paydo boʻlishiga qaramay, proinflyatsion xavf-xatarlarning saqlanib qolishi amaldagi qattiq pul-kredit sharoitlarini ushlab turishni talab qiladi, deb bayonot berdi regulyator.