Birlashib buyuk tarix yaratamiz: «Ma’rifat karvoni» ziyolilarni umummilliy harakatga safarbar etmoqda
«Ma’rifat karvoni» loyihasi «Birlashib, buyuk tarix yaratamiz» shioriga muvofiq, Prezident Shavkat Mirziyoyevning mustaqillik yilligiga bag‘ishlangan
Birlashib buyuk tarix yaratamiz: «Ma’rifat karvoni» ziyolilarni umummilliy harakatga safarbar etmoqda
«Ma’rifat karvoni» loyihasi «Birlashib, buyuk tarix yaratamiz» shioriga uyg‘un ravishda, Prezident Shavkat Mirziyoyevning mustaqillik yilligiga bag‘ishlangan g‘oyalarini jamiyatga yetkazishga yo‘naltirilgan. Loyiha 4 sentyabr kuni 40 nafar targ‘ibotchi uchun o‘tkazilgan mashg‘ulotdan keyin 7–9 sentyabr kunlari Qoraqalpog‘iston, Andijon, Samarqand, Navoiy, Farg‘ona, Namangan, Buxoro va Xorazm viloyatlarida davom etdi. Ushbu ilmiy-ma’rifiy uchrashuvlarda 8 hududdan jami 2089 nafar ishtirokchi qatnashdi.
Buyuk o‘zgarishlar eng avvalo inson tafakkurida boshlanadi. Yangi fikr paydo bo‘ladi, savol tug‘iladi, muloqot yuzaga keladi. Eng muhimi, ana shu fikr va tashabbuslar harakatga aylanadi. Bugun yurtimizda “Birlashib, buyuk tarix yaratamiz” shiori ostida o‘tayotgan ilmiy-ma’rifiy tadbirlar aynan shu jarayonning amaliy ko‘rinishiga aylanmoqda.
“Ma’rifat karvoni” bir hududdan boshqasiga nafaqat g‘oya, balki muloqot, mushohada va tashabbus ruhini ham olib bormoqda. Uning asosiy maqsadi — Prezident Shavkat Mirziyoyevning mamlakatimiz mustaqilligining 35 yilligiga bag‘ishlangan tantanali marosimda ilgari surgan g‘oya va tashabbuslarini xalqimizga sodda, aniq va hayotiy misollar orqali yetkazish, ularni amaliy harakatga aylantirishdir.
Respublika Ma’naviyat va ma’rifat markazi, Oliy Majlis huzuridagi jamoat fondi, “Ma’rifat” targ‘ibotchilar jamiyati, Ijtimoiy-ma’naviy tadqiqotlar instituti va boshqa tashkilotlar bilan hamkorlikda amalga oshirilayotgan ushbu “Ma’rifat karvoni” oddiy targ‘ibot emas. Chunki bu jarayonda inson faqat tinglovchi bo‘lib qolmaydi, balki fikr bildiruvchi, savol beruvchi va tashabbus ko‘rsatuvchi ishtirokchiga aylanadi.
Har bir uchrashuvda yangi fikr tug‘iladi. Yangi fikr esa yangi harakat uchun zamin yaratadi. Shu ma’noda, karvonning har bir manzili o‘ziga xos ma’rifiy maydondir. Bu yerda davlat xizmatchisi bilan nuroniy, yoshlar yetakchisi bilan xotin-qizlar faoli, targ‘ibotchi bilan jamoatchilik vakili bir maqsad atrofida muloqot qiladi. Maqsad esa bitta — yurt taraqqiyotiga daxldorlik hissini kuchaytirish.
Katta harakat kichik, ammo muhim qadamdan boshlandi.
4 sentyabr kuni Respublika Ma’naviyat va ma’rifat markazida 40 nafar respublika targ‘ibotchisi uchun seminar-trening tashkil etildi. Ularga hududlar, vazirlik va idoralarda ma’rifiy tadbirlarni samarali tashkil etishning zamonaviy usullari bo‘yicha metodik tavsiyalar berildi. Ssenariylar, videomateriallar, taqdimotlar va ma’ruza matnlari taqdim etildi. Endi bu bilim va tajriba hududlarga yetkazilmoqda. Ya’ni 40 nafar targ‘ibotchi — 40 ta manzil emas. Ular ortida minglab uchrashuvlar, minglab muloqotlar va yangi tashabbuslar turibdi. Bir fikrning ko‘payishi — uning kuchga aylanganidir.
7–9 sentyabr kunlari Qoraqalpog‘iston Respublikasi hamda Andijon, Samarqand, Navoiy, Farg‘ona, Namangan, Buxoro va Xorazm viloyatlarida seminar-treninglar va ilmiy-ma’rifiy uchrashuvlar o‘tkazildi. Tadbirlarda Qoraqalpog‘istondan 440, Samarqanddan 190, Andijondan 100, Navoiydan 150, Farg‘onadan 220, Namangandan 264, Buxorodan 225 va Xorazmdan 500 nafar ishtirokchi qatnashdi. Jami — 2089 nafar. Bir qarashda bu shunchaki raqam. Ammo har bir raqam ortida inson bor. Uning savoli, fikri, hayotiy tajribasi, taklifi va kelajak haqidagi qarashlari bor. Shu bois “Ma’rifat karvoni”ning eng katta natijasini raqamlarda emas, odamlarning fikrida ko‘rish mumkin.
Ma’rifat — faqat bilim berish emas. U insonni o‘ylashga, izlanishga va harakat qilishga undaydi. Shuning uchun seminarlarda davlat xizmatchilari, nuroniylar, xotin-qizlar faollari, yoshlar yetakchilari va ma’rifat targ‘ibotchilarining ishtirok etayotgani bejiz emas. Ularning har biri o‘z jamoasiga, o‘z mahallasiga, o‘z hududiga yangi fikr olib boradi.
Bir insonda uyg‘ongan fikr bir jamoani harakatga keltirishi mumkin. Bir jamoaning harakati esa butun hududda ijtimoiy muhitni o‘zgartirishi mumkin.
“Ma’rifat karvoni”ning yo‘li hali uzoq. U bir hududdan boshqasiga, bir jamoadan boshqasiga ezgu g‘oyalarni olib boradi. Har bir uchrashuvda savollar tug‘iladi, fikrlar to‘qnashadi, yangi tashabbuslar paydo bo‘ladi. Aslida, karvonning eng muhim manzili muayyan bino yoki hudud emas. Uning eng muhim manzili — inson qalbi va tafakkuri. Chunki tafakkur o‘zgarsa, munosabat o‘zgaradi. Munosabat o‘zgarsa, harakat paydo bo‘ladi. Harakat esa natija yaratadi.
Bugun “Ma’rifat karvoni” atrofida birlashayotgan minglab insonlarning maqsadi mushtarak: islohotlarning mazmun-mohiyatini chuqur anglash, yurt taqdiriga daxldorlikni his etish va taraqqiyotga o‘z hissasini qo‘shish. Zero, buyuk tarixni faqat tarixchilar yozmaydi. Uni o‘z davrida mas’uliyatni his qilgan, bilimga intilgan, ezgu maqsad atrofida birlashgan insonlar yaratadi.
Bugungi yangi fikr — ertangi yangi harakat. Bugungi yangi harakat esa kelajakning buyuk tarixiga aylanadi. Yangi fikr — yangi harakat — yangi natija.