Birinchi jahon urushining soʻnggi haftasida halok boʻlgan qahramonning medali auktsionga qoʻyildi
Jeyms Kirk nizoning soʻnggi kunlarida safdoshlarini himoya qilish chogʻida halok boʻlgan, deydi auktsionchilar.
Birinchi jahon urushining soʻnggi haftasida halok boʻlgan qahramonning medali auktsionga qoʻyildi
Ikkinchi leytenant Jeyms Kirk Birinchi jahon urushining soʻnggi haftasida halok boʻlgan edi
Birinchi jahon urushining soʻnggi haftasida safdoshlarini himoya qilish paytida halok boʻlgan askarga berilgan Viktoriya xochi medali kim oshdi savdosiga qoʻyilmoqda.
Katta Manchesterning Chidl Xyum hududidan boʻlgan Jeyms Kirk 1918 yil noyabr oyida Frantsiyada koʻprik qurayotgan askarlarni himoya qilish paytida kuchli pulemyot oʻqidan halok boʻlgan edi.
21 yoshli ikkinchi leytenant yuzidan oʻq yeganidan keyin ham, nemis pulemyotchilariga qarshi yolgʻiz oʻzi kurashish uchun kanaldan suzib oʻtib, jangni davom ettirgan.
Uning medali 7 oktyabr kuni Londonning Noonans auktsion uyi tomonidan sotiladi va u 100 000 dan 160 000 funt sterlinggacha baholanishi kutilmoqda.
Noonans vakillarining soʻzlariga koʻra, Kirk 1918 yil 4 noyabrdagi Sambr jangi paytida Uaza kanali ustidan koʻprik qurishga harakat qilayotgan Qirollik muhandislarini himoya qilishga urinib, "eng oliy qurbonlikni keltirgan".
Kirk Lyuis pulemyoti va toʻrtta oʻqdonni olib, benzin kanistralari va poʻkak qalqib turuvchi moslamalardan yasalgan solda "eng shiddatli pulemyot oʻqlari ostida" suv yoʻlini suzib oʻtgan, deydi Noonans.
Jeyms Kirk koʻrsatgan jasorati uchun Viktoriya xochi bilan taqdirlangan
Auktsionchilar qoʻshimcha qildi: "Qirgʻoq pulemyotlar bilan toʻla edi.
"U oʻz Lyuis pulemyotini 10 yard (taxminan 9 metr) masofada oʻrnatdi va barcha oʻq-dorilarini uzib tugatdi.
"Unga solda qoʻshimcha oʻq-dorilar suzib keltirildi va u Qirollik muhandislarining vazifasini bajarishini pana qilib, oʻq uzishda davom etdi.
"U qoʻlidan va yuzidan yaralangan boʻlsa-da, eng ochiq pozitsiyadan tinimsiz oʻq uzdi, toki boshidan oʻq yeb, pulemyoti ustiga jonsiz yiqilgunga qadar."
1918 yil 11 noyabrda Yarashuv kunida urush tugaganini nishonlash uchun Londonda ulkan olomon toʻplandi
Kirkning vafotidan keyin berilgan Viktoriya xochi uning urushdagi xizmatlari uchun berilgan boshqa uchta medali bilan birga sotilmoqda.
U mashhur urush shoiri Uilfred Ouen halok boʻlgan jangda vafot etgan
.
Birinchi jahon urushi paytida 17 million askar va tinch aholi halok boʻlgan
.