Birinchi jahon urushining soʻnggi haftasida halok boʻlgan qahramonning medali 130 ming funt sterlingga sotildi
Jeyms Kirk nizoning soʻnggi kunlarida safdoshlarini himoya qilish chogʻida halok boʻlgan, deydi auktsionchilar.
**Birinchi jahon urushining soʻnggi haftasida berilgan qahramonlik medali 130 ming funt sterlingga sotildi**
Ikkinchi leytenant Jeyms Kirk Birinchi jahon urushining soʻnggi haftasida halok boʻlgan edi
Birinchi jahon urushining soʻnggi haftasida halok boʻlgan askarga berilgan Viktoriya xochi medali 130 000 funt sterlingga sotildi.
Chidl Xyumlik Jeyms Kirk 1918 yil noyabr oyida Frantsiyada koʻprik qurayotgan askarlarni himoya qilish paytida kuchli pulemyot oʻqi ostida halok boʻlgan.
21 yoshli ikkinchi leytenant yuzidan oʻq yeganidan keyin ham, nemis pulemyotchilariga qarshi yolgʻiz oʻzi kurashish uchun kanal orqali suzib oʻtib, jangni davom ettirgan.
Londondagi Noonans auktsion uyi medalni 7 oktyabr kuni sotdi. U 100 000 dan 160 000 funt sterlinggacha baholangan edi.
Noonans vakillarining soʻzlariga koʻra, Kirk 1918 yil 4 noyabrdagi Sambr jangi paytida Uaza kanali ustidan koʻprik qurishga harakat qilayotgan Qirollik muhandislarini himoya qilishda "eng oliy qurbonlik"ni keltirgan.
Kirk Lyuis pulemyoti va toʻrtta oʻqdonni olib, benzin kanistralari va poʻkak qalqib chiquvchi moslamalardan yasalgan solda "eng shiddatli pulemyot oʻqlari ostida" suv yoʻlini suzib oʻtgan, deydi Noonans.
Jeyms Kirk koʻrsatgan jasorati uchun Viktoriya xochi bilan taqdirlangan
Auktsionchilar qoʻshimcha qildi: "Qirgʻoq pulemyotlar bilan toʻla edi.
U Lyuis pulemyotini 10 yard (taxminan 9 metr) masofada oʻrnatdi va barcha oʻq-dorilarini uzib tugatdi.
Qoʻshimcha oʻq-dorilar unga solda suzib yetkazildi va u Qirollik muhandislarini oʻz vazifasini bajarishida himoya qilib, otishmani davom ettirdi.
U qoʻlidan va yuzidan yaralangan boʻlsa-da, eng ochiq pozitsiyadan turib, boshidan oʻq yeb, pulemyoti ustiga jonsiz yiqilgunga qadar toʻxtovsiz oʻq uzdi".
Savdodan soʻng, Noonans mijozlar bilan aloqalar boʻlimi rahbari Kristofer Mellor-Xill shunday dedi: "Ushbu mukofot Britaniya jasorat mukofotlarining yangi kollektsiyasidan joy olganini koʻrishdan juda xursandman".
Kirkning vafotidan keyin berilgan Viktoriya xochi uning urushdagi xizmatlari uchun berilgan boshqa uchta medali bilan birga sotildi.
U mashhur urush shoiri Uilfred Ouen bilan bir jangning oʻzida halok boʻlgan
Birinchi jahon urushi paytida 17 million askar va tinch aholi halok boʻlgan