Besh mamlakatdan 400 ga yaqin ishtirokchi: Samarqandda Promotors Show 2026 boʻlib oʻtdi. Video

Besh mamlakatdan 400 ga yaqin ishtirokchi: Samarqandda Promotors Show 2026 boʻlib oʻtdi. Video

12–13 sentyabr kunlari Samarqanddagi SOF Expo koʻrgazmalar markazida Oʻzbekiston, Qozogʻiston, Qirgʻiziston, Tojikiston va Rossiyadan 400 ga yaqin ishtirokchini birlashtirgan yirik avtomobil tadbiri — Promotors Show 2026 boʻlib oʻtdi. Dastur doirasida drift, tyuning, retroavtomobillar, avtotovush va mototexnika namoyish etildi.

Ikki kun davomida mehmonlar noyob va zamonaviy avtomobillar, sport mashinalari hamda mualliflik tyuning-loyihalari bilan tanishish imkoniga ega boʻldilar. Dasturning asosiy elementlaridan biri Drift Show boʻldi. Bunda, tashkilotchilarning tushuntirishicha, tadbir formati musobaqalarni nazarda tutmagan.

Doppi Team jamoasining drift-piloti Sanjar Saydazov professional pilotlar uchun bunday tadbirlar birinchi navbatda mashgʻulot vazifasini oʻtashini taʼkidladi.

«Bu koʻproq professional pilotlar uchun mashgʻulotdir. Bu bizga doʻstona muhit taqdim etadi: biz uchamiz, mashq qilamiz va tomoshabinlar uchun shou yaratamiz», — dedi u.

Drift Show tashkilotchisi va Promotors Show hamtashkilotchisi Eduard Chenning soʻzlariga koʻra, loyihaning maqsadlaridan biri — drift va avtomobil tyuningi bilan maxsus tayyorlangan va xavfsiz sharoitlarda shugʻullanish mumkinligini koʻrsatishdir.

«Biz bularning barchasini Oʻzbekistonda avtomadaniyatni rivojlantirish va qoʻllab-quvvatlash uchun tashkil etmoqdamiz. Murojaatimiz shunday: mashinalarni drift qilish yoki tyuning qilishni madaniyatli va toʻgʻri tarzda — yoʻllarda emas, balki maxsus ajratilgan joylarda amalga oshirish lozim», — deb qayd etdi u.

U shuningdek, maydonchani tayyorlashda beton va metall toʻsiqlardan foydalanilishini, trassani esa professionallar chizishini qoʻshimcha qildi. Tadbirning oʻtkazilishi tegishli tashkilotlar bilan kelishiladi.

### Uchta drift-mashinadan 50 dan ortiqqacha

Tashkilotchilar soʻnggi yillarda Oʻzbekistonda avtosport va avtomobil madaniyatiga boʻlgan qiziqish sezilarli darajada ortganini taʼkidlamoqdalar.

Promotors Show tashkilotchisi Ahmad Tojiboyevning soʻzlariga koʻra, 2022 yilgacha bu kabi tadbirlar asosan Toshkentda oʻtkazilgan. Samarqandda shouning tashkil etilishi, uning fikricha, hududlarda ham avtomobil harakati rivojlanishiga yordam berishi kerak.

«2022 yilda professional drift-mashinalar uchta edi. Bugungi kunda angarimizda 50 dan ortiq avtomobil bor va yana 15 tasi maydonga chiqishni kutmoqda. Menimcha, bu avtomobil madaniyati rivojlanayotganining yaxshi koʻrsatkichidir», — dedi u.

Bu yil tadbirga mintaqaning bir nechta davlatlaridan avtohavaskorlar tashrif buyurishdi. Tashkilotchilarning soʻzlariga koʻra, ishtirokchilarning xalqaro tarkibi avtomobil egalari va pilotlarga tajriba almashish hamda avtomobil hamjamiyatini kengaytirishga yordam beradi.

### Avtomobil hamjamiyati — nafaqat musobaqalar

Eduard Chen koʻplab ishtirokchilar uchun bunday tadbirlar birinchi navbatda muloqot maydoni ekanligini taʼkidladi.

«Bu odamlar yigʻiladigan, muloqot qiladigan, doʻstlashadigan oʻziga xos hamjamiyatdir. Bu yerda juda katta mablagʻ, koʻp vaqt va kuch sarflanadi, lekin bularning barchasi shunchaki oʻzini koʻrsatish uchun qilinmaydi. Koʻp hollarda avtomobil oʻzi uchun quriladi», — dedi u.

Шу билан бирга, Promotors Show'da ishtirokchilar bir-birlari bilan musobaqalashmay, oʻzlarining shaxsiy loyihalarini taqdim etdilar. Tashkilotchining soʻzlariga koʻra, har bir avtomobil egasi uchun uning qiziqishlari va didining oʻziga xos aksidir.

### Retroavtomobillar va tarixni saqlash

Koʻrgazmaning alohida bloki retroavtomobillarga bagʻishlandi. Retro Uz klubi raisi Botir Azimov klub 2015 yilda tashkil etilgani va Oʻzbekiston Adliya vazirligida rasmiy roʻyxatdan oʻtganini soʻzlab berdi.

Bugungi kunda klubda 30 ga yaqin ishtirokchi bor. Ularning kollektsiyalarida 50 ga yaqin retroavtomobil mavjud: ulardan 30 tasi yurib turibdi, yana 20 tasi restavratsiya jarayonida.

«Klubimizning maqsad va vazifalari — Oʻzbekiston Respublikasi hududidagi noyob avtomobil va mototsikllarni saqlab qolish, ularni kelajak avlodga koʻrsatish va ushbu avtomobillarning tarixiy ahamiyatini saqlashdan iborat», — dedi Azimov.

Uning soʻzlariga koʻra, mamlakatda retrotexnikaga boʻlgan qiziqish ham ortib bormoqda.

«Oʻzbekistonda soʻnggi besh-olti yil ichida avtomadaniyat bir necha pogʻona yuqoriga koʻtarildi. U rivojlana boshladi va bu yaxshi. Promotors Show kabi tadbirlar Oʻzbekiston Respublikasi avtomadaniyatiga qoʻshilgan katta hissadir», — deb taʼkidladi u.

Klubning noodatiy kollektsiyalaridan biri uning ishtirokchilaridan biriga tegishli 35 ta mototsikldan iborat toʻplam boʻldi. Texnikalar 1945 yildan 1980 yilgacha boʻlgan davrga tegishli. Barcha mototsikllar tiklangan va ishchi holatda.

Taqdim etilgan avtomobillar orasida nafaqat zamonaviy tyuning-loyihalar, balki tarixga ega mashinalar ham bor edi.

Andrey Golovchenko koʻrgazmaga 1950 yilda ishlab chiqarilgan GAZ-67 avtomobilini olib keldi. Uning soʻzlariga koʻra, avtomobilni qidirishga bir yildan ortiq vaqt ketgan. Mashina eskirgan, ishlamaydigan holatda topilgan, shundan soʻng restavratsiya ishlari boshlangan.

Ishlar qariyb ikki yil davom etdi. Kuzov ramadan toʻliq yechib olindi, detallar metallgacha tozalandi, dvigatel qismlarga ajratilib, qayta tiklandi. Baʼzi ehtiyot qismlarni faqat yana ikkita donor-avtomobil sotib olingandan keyingina topish imkoni boʻldi.

«Katta mehnatdan keyin boʻyoqlash ishlarini bajardik. Ikki yildan soʻng mashina yurdi. Bu birinchi chiqish edi», — dedi avtomobil egasi.

GAZ-67 1943 yildan 1953 yilgacha ishlab chiqarilgan. Taqdim etilgan avtomobil 3,3 litrli va 56 ot kuchiga ega original dvigatel bilan jihozlangan. Mashina birinchi navbatda harbiy texnika sifatida yaratilgan va ogʻir yuklarni shatakka olishga moʻljallangan.

Toshkentlik boshqa bir ishtirokchi oʻzi «Oq ayiq» deb ataydigan tyuning qilingan Chevrolet Cobalt avtomobilini namoyish etdi. Loyiha 2020 yildan beri mavjud boʻlib, avtotovush yoʻnalishida bajarilgan.

Egasining soʻzlariga koʻra, uni yaratish uchun avtomobilning oʻz narxini hisobga olmaganda 30 ming dollardan ortiq mablagʻ sarflangan. Loyiha allaqachon xalqaro musobaqalar va avtomobil festivallarida ishtirok etgan.

### Maydonchada mototsikllar ham taqdim etildi

Promotors Show faqat avtomobil mavzusi bilan cheklanib qolmadi. Ishtirokchilar orasida Toshkentning Velmax kompaniyasi ham bor boʻlib, u toʻrtta mototsiklni taqdim etdi.

Ekspozitsiyadan 27 dyuymli gʻildirakka ega 2020 yilgi Harley-Davidson Breakout, 2021 yilgi BMW S1000RR, Kawasaki Z1000 R Edition va 170 ot kuchiga ega BMW S1000R joy oldi.

Shu tariqa, tashrif buyuruvchilar motomadaniyatning bir nechta yoʻnalishlarini — retrotexnika va klassik avtomobillardan tortib, zamonaviy sport mashinalari, tyuning, avtotovush va mototsikllargacha bir vaqtning oʻzida koʻrish imkoniga ega boʻldilar.

### Tomoshabinlar hayrati

Tadbirning asosiy xususiyatlaridan biri shunda boʻldiki, uning ishtirokchilari nafaqat oʻz avtomobillarini koʻrsatish, balki fikrdoshlari bilan muloqot qilish uchun ham kelishdi.

Drift Show'ga tashrif buyurgan termizlik Yuliana chiqishlar unda juda katta taassurot qoldirganini tan oldi.

«Bu yerda boʻlganimdan juda ham xursandman. Men ulkan hayrat va quvonch hissini tuydim. Bu shunchaki ajoyib», — deya oʻz taassurotlari bilan oʻrtoqlashdi Yuliana.

Tashkilotchilarning taʼkidlashicha, Promotors Show asta-sekin turli shahar va mamlakatlardan kelgan avtomobil hamjamiyati vakillarini birlashtiruvchi maydonga aylanib bormoqda. Ularning soʻzlariga koʻra, navbatdagi maqsad — tyuning, avtotovush, drift va retrotexnika sohasidagi loyihalarni rivojlantirishni davom ettirishdir.

Бу йил SOF Expo'dagi ikki kunlik tadbir besh mamlakatdan 400 ga yaqin ishtirokchini birlashtirdi va Oʻzbekistonda avtomobil madaniyati shunchaki avtomobillarga boʻlgan qiziqish doirasidan chiqib, rivojlanishda davom etayotganini koʻrsatdi.