Baxtiyor Inokov Surxondaryo viloyati IIB boshlig‘i bo‘ldi
Podpolkovnik Baxtiyor Inokov Surxondaryo viloyati IIB boshlig‘i etib tayinlandi. Unga jinoyatchilikka qarshi kurashni kuchaytirish vazifasi yuklatildi.
Baxtiyor Inokov Surxondaryo viloyati IIB boshlig‘i lavozimiga tayinlandi.
O‘zbekiston Respublikasi Ichki ishlar vazirligi matbuot xizmatining ma’lum qilishicha, podpolkovnik Baxtiyor Rahimjonovich Inokov Surxondaryo viloyati Ichki ishlar boshqarmasining yangi boshlig‘i etib tayinlangan.
Uning zimmasiga jinoyatchilikka qarshi kurash samaradorligini oshirish hamda har bir mahallada xavfsizlikni taʼminlash vazifalari yuklatildi.
Shuningdek, yangi rahbar aholi bilan yaqin hamkorlikni yo‘lga qo‘yishi, fuqarolar murojaatlarida ko‘tarilgan muammolarni o‘rganishi va ularni hal etish yo‘llarini topishi lozim. Ichki ishlar organlariga aholining ishonchini mustahkamlashga alohida eʼtibor qaratish topshirildi.
Tuman va shahar ichki ishlar bo‘limlari rahbarlariga jinoyat sodir etilishiga olib keluvchi omillarni manzilli bartaraf etish hamda har bir mahalladagi ish samaradorligini oshirish vazifasi yuklatildi.
Baxtiyor Inokov ushbu lavozimda Timur Ismoilovning o‘rnini egalladi.
Eslatib o‘tamiz, Timur Ismoilov avvalroq O‘zbekiston ichki ishlar vazirining birinchi o‘rinbosari — Jamoat xavfsizligi departamenti boshlig‘i etib tayinlangan edi.