Barselona mintaqasida kuzatilgan kuchli yomgʻir va toʻsatdan yuzaga kelgan suv toshqinlari oqibatida bir kishi halok boʻldi

Barselona mintaqasida kuchli yomgʻir va toʻsatdan yuz bergan suv toshqinlari oqibatida bir kishi halok boʻldi, shuningdek, jala quyishi Valensiya va Kataloniya boʻylab suv toshqinlariga sabab boʻldi.

Ispaniyaning shimoli-sharqiy qismiga kuchli yomgʻir va toʻsatdan yuz bergan suv toshqinlari yopirildi, buning oqibatida bir kishi halok boʻldi va butun mintaqada keng koʻlamli uzilishlar yuzaga keldi. Ispaniya milliy meteorologiya agentligi (AEMET) chorshanba kuni sharqiy hududlarda kuchli yomgʻir yogʻishi haqida ogohlantirish, jumladan, Barselona sohillari uchun qizil xavf darajasini eʼlon qildi.

Qutqaruvchilar payshanba kuni Barselonadan taxminan 40 km (25 mil) gʻarbda joylashgan Olivella shahrida mashinasi oqim tomonidan oqizib ketilgan erkak kishining jasadini topishdi, deb xabar berdi rasmiylar.

Kuchli yogʻingarchilik Kataloniya va Valensiya boʻylab qatnovlarni izdan chiqardi, parvozlar bekor qilindi va yoʻllarni suv bosdi. Rasmiylar zarurat boʻlmasa sayohat qilmaslikni tavsiya qildi, Bosh vazir Pedro Sanches esa «juda murakkab vaziyatlar» haqida ogohlantirdi.

Kataloniya favqulodda vaziyatlar xizmati kuchli yomgʻirlar bilan bogʻliq 850 dan ortiq qoʻngʻiroq qabul qilganini va 500 dan ortiq hodisani qayd etganini maʼlum qildi.

Kataloniya oʻt oʻchiruvchilari payshanba kuni X ijtimoiy tarmogʻida Olivellada «erkak kishining jonsiz jasadini» topishganini maʼlum qilib, bedarak yoʻqolgan shaxs ayol kishi boʻlgani haqidagi avvalgi xabarlarga tuzatish kiritdi.

Ijtimoiy tarmoqlarda tarqalgan videolarda qisman suv ostida qolgan mashinalar va suv bosgan yer osti yoʻlida qolib ketgan transport vositasiga yetib borishga urinayotgan qutqaruvchilar aks etgan.

Barselonada ayrim metro stantsiyalari yopildi va avtobuslar yoʻnalishi oʻzgartirildi, shuningdek, mintaqaviy poyezdlar qatnovi izdan chiqdi va El-Prat aeroportida reyslar kechiktirildi yoki bekor qilindi.

Qoʻshni Valensiyaning bir nechta munitsipalitetlarida bor-yoʻgʻi yarim soat ichida 70 mm dan (2,76 dyuym) ortiq yomgʻir yogʻdi, deb xabar beradi AVAMET.

«30 daqiqa ichida bunchalik koʻp yogʻingarchilik toʻplanishini kamdan-kam kuzatganmiz», deb yozdi meteorologiya assotsiatsiyasi X tarmogʻida.

Favqulodda vaziyatlar xizmati Valensiya provintsiyasida 478 ta hodisa haqida xabar berdi, ularning aksariyati mulkka zarar yetishi, suv sizib chiqishi va harakatlanishdagi uzilishlar bilan bogʻliq.

Mintaqa poytaxtida barcha metro liniyalari faoliyati toʻxtatildi va shahar aeroporti bir necha soatga yopib qoʻyildi, bu esa reyslarning boshqa yoʻnalishlarga yoʻnaltirilishiga sabab boʻldi.

Maydon suv bilan toʻlib qolgani va oʻyinchilar tuneliga suv sizib kirgani sababli «Levante» va «Atletik Bilbao» jamoalari oʻrtasidagi futbol uchrashuvi qoldirildi.

Kuchli yogʻingarchilik Ispaniya tarixdagi eng issiq yoz va sentyabr oyining gʻayrioddiy issiq boshlanishidan chiqayotgan bir paytda yuz berdi.

Olimlarning taʼkidlashicha, inson faoliyati taʼsiridagi iqlim oʻzgarishi odatda kuzda Ispaniya sharqiga zarba beradigan Oʻrta yer dengizi boʻronlarini kuchaytirmoqda.

Oʻrta yer dengizi yoz davomida issiqlikni yutadi, bu esa bugʻlanishni oshiradi va boʻronlar paydo boʻlganda yanada kuchliroq yogʻingarchilikka olib keladi.

Ushbu suv toshqini Valensiyada 230 dan ortiq odamning hayotiga zomin boʻlgan vayronkor toshqindan ikki yil oʻtmay sodir boʻldi.