«Barselona» Levandovskini klub afsonalari ro‘yxatiga kiritdi
Polshalik futbolchi «Barselona» safidagi 193 ta o‘yinda 120 ta gol urib, uch marta Ispaniya chempionligini qo‘lga kiritgan.
«Barselona» Levandovskini klub afsonalari qatoriga qo‘shdi
Ispaniyaning «Barselona» futbol klubi o‘zining rasmiy veb-saytidagi «klub afsonalari» bo‘limiga sobiq hujumchisi, hozirda MLS’ning «Chikago Fayr» jamoasida o‘ynayotgan Robert Levandovskini kiritdi.
37 yoshli polshalik futbolchi klub tarixida chuqur iz qoldirgan o‘yinchilar ro‘yxatidan joy oldi. Ushbu bo‘limda Lionel Messi, Xosep Gvardiola, Diyego Maradona, Yoxan Kroyff va «Barselona»ning boshqa sobiq futbolchilari ham mavjud. Ro‘yxatda jami 110 ta ism bor.
Levandovski Myunxenning «Bavariya» klubidan transfer qilinganidan so‘ng 2022-yildan beri to‘p tepib kelayotgan «Barselona»ni tark etishini e’lon qilgandi.
Polshalik futbolchi Kataloniya klubi bilan uch marta Ispaniya chempionligi, bir marta mamlakat Kubogi va uch marta Superkubogini qo‘lga kiritgan. Uning hisobida 193 ta o‘yinda urilgan 120 ta gol bor.
U Polsha terma jamoasi safida 167 ta o‘yinda 89 ta gol urgan (bu ikkala ko‘rsatkich bo‘yicha ham rekordchi hisoblanadi). Levandovski to‘rtta Yevropa va ikkita Jahon chempionatida ishtirok etgan.