Barclays sunʼiy intellektdan foydalanishni oshirishi munosabati bilan 5 000 ta ish oʻrnini qisqartirmoqda
Bank SIning koʻproq qoʻllanilishi uning ishchi kuchi 5% ga qisqarishiga olib kelayotganini aytmoqda.
Barclays oʻz faoliyatida sunʼiy intellektdan (SI) foydalanishni kengaytirayotgani sababli joriy yilda 5 000 ga yaqin ish oʻrnini qisqartiradi.
Bank guruhining maʼlum qilishicha, 1 000 ta shtat allaqachon tugatilgan va 2026 yil oxirigacha yana 4 000 ta ish oʻrni qisqartirilishi kutilmoqda.
Qisqartirishlar uning global ishchi kuchining 5 foizini tashkil etadi, taʼsirga uchragan lavozimlarning aksariyati operativ va funktsional sohalarga toʻgʻri keladi.
Barclays’ning taʼkidlashicha, qisqartirishlar texnologiyalarga kiritilgan investitsiyalar natijasidir, chunki SI ayrim ish jarayonlari samaradorligini oshirishga yordam bermoqda.
Bank asosan Buyuk Britaniyadagi chakana bank biznesini nishonga olgan uch yillik xarajatlarni qisqartirish kampaniyasining yakuniga yaqinlashmoqda, garchi bu investbanking boʻlimiga ham taʼsir koʻrsatgan boʻlsa-da.
Barclays shuningdek, oxirgi uch oylik hisobot davrida 2,3 milliard funt sterling foyda koʻrganini maʼlum qildi, bu oʻtgan yilning mos davriga nisbatan yuqori, ammo kutilganidan sal kamroqdir.
Iqtisodchilar yangi texnologiyalarga, ayniqsa SIga kiritilayotgan investitsiyalar samaradorlikni oshirish va xodimlar sonini kamaytirish orqali kundalik faoliyatni oʻzgartirayotgani dalillarini topish uchun kompaniyalar natijalarini diqqat bilan oʻrganmoqdalar.
Barclays guruhi bosh ijrochi direktori Si-Es Venkatakrishnanning taʼkidlashicha, ish oʻrinlarining qisqartirilishi "bir necha yil davomida texnologiyalarga kiritgan va kiritishda davom etayotgan investitsiyalarimiz natijasidir".