Banklar kreditlarining 45 foizi va depozitlarining 76 foizi Toshkent hissasiga toʻgʻri keladi
2026 yil 1 oktyabr holatiga koʻra, Toshkentda 297,5 trln soʻm kreditlar va 383 trln soʻm depozitlar jamlangan, hududlarda esa kreditlar omonatlardan uch baravar koʻp.
Banklar kreditlarining 45 foizi va depozitlarining 76 foizi Toshkent hissasiga toʻgʻri keladi
2026 yil 1 oktyabr holatiga koʻra, Toshkent shahri hissasiga 297,5 trln soʻmlik bank kreditlari yoki ularning umumiy hajmining 45,1 foizi, shuningdek, 383 trln soʻmlik depozitlar yoki mamlakat banklariga joylashtirilgan barcha mablagʻlarning 76,4 foizi toʻgʻri keldi. Bu haqda Oʻzbekiston Markaziy banki xabar bermoqda.
Kompaniyalar mablagʻlarining toʻplanishi ayniqsa yuqori. Poytaxtda yuridik shaxslarning 275,8 trln soʻmlik depozitlari jamlangan boʻlib, bu ularning respublika boʻyicha umumiy hajmining 89,1 foizini tashkil etadi. Toshkentda yuridik shaxslarga berilgan kreditlar 224,3 trln soʻmga, aholiga berilgan kreditlar esa 73,2 trln soʻmga yetdi.
Toshkent hanuzgacha depozitlar kreditlardan ortiq boʻlgan yagona hudud boʻlib qolmoqda. Poytaxtda kreditlar va depozitlar nisbati 0,78 ni tashkil etadi.
Qolgan 13 ta hududda vaziyat aksincha. U yerda kreditlarning umumiy hajmi 361,6 trln soʻmni, depozitlar esa 118,1 trln soʻmni tashkil etdi, yaʼni berilgan mablagʻlar jalb qilingan mablagʻlardan uch baravar koʻp.
Eng katta farq Sirdaryo viloyatida qayd etilgan boʻlib, u yerda kreditlar depozitlardan 9,1 baravar, shuningdek, Jizzax (5,4 baravar) va Namangan (4,8 baravar) viloyatlarida koʻpdir.
Kreditlar hajmi boʻyicha hududlar orasida Fargʻona viloyati 38,7 trln soʻm bilan yetakchilik qilmoqda. Keyingi oʻrinlarni Samarqand (34,5 trln), Toshkent (31,4 trln), Andijon (31,2 trln) va Qashqadaryo (31 trln soʻm) viloyatlari egallab turibdi.
Eng kam kreditlash hajmi Jizzax (21,2 trln), Sirdaryo (21,3 trln) va Navoiy (21,6 trln soʻm) viloyatlarida qayd etildi.
Depozitlar hajmi boʻyicha hududlar orasida birinchi oʻrinni Samarqand viloyati egallab turibdi — 14,7 trln soʻm. Bundan keyin Buxoro (13,9 trln) va Xorazm (13 trln soʻm) viloyatlari bormoqda.
Eng kam mablagʻ Sirdaryo (2,3 trln), Jizzax (3,9 trln) va Namangan (5,2 trln soʻm) viloyatlari banklariga joylashtirilgan.
Oltata hududda aholi kompaniyalarga qaraganda koʻproq kredit olgan. Bular Qoraqalpogʻiston Respublikasi, Andijon, Qashqadaryo, Navoiy, Samarqand va Surxondaryo viloyatlaridir. Eng katta farq Navoiy viloyatida qayd etilgan boʻlib, u yerda jismoniy shaxslarga berilgan kreditlar 13,2 trln soʻmni, yuridik shaxslarga berilgan kreditlar esa 8,4 trln soʻmni tashkil etgan.
14 ta hududdan 12 tasida aholi omonatlari kompaniyalar depozitlaridan ortiq — Toshkent va Andijon viloyatidan tashqari barcha joyda. Buxoro viloyatida jismoniy shaxslar banklarga 11,6 trln soʻm, Xorazmda esa 11,4 trln soʻm joylashtirgan.