Bangladeshning yangi prezidenti saylandi
Bangladeshda yangi prezident saylandi. 20-avgust kuni mamlakat parlamenti hukmron Bangladesh Milliy partiyasi (BNP) bosh kotibi Mirza Faxrul Islom Olamgirni ushbu lavozimga sayladi. Bu haqda Deutsche Welle xabar berdi.
Parlamentda uchdan ikki qismdan ko‘proq o‘ringa ega bo‘lgan BNP partiyasi Olamgirni asosan ramziy vakolatlarga ega bo‘lgan ushbu lavozimga munosib ko‘rdi. U muxolifatdagi “Jamoati Islomiy” alyansidan nomzod, nafaqadagi harbiydan siyosatchiga aylangan Oli Ahmadni mag‘lub etdi.
173 million aholiga ega mamlakatning 23-prezidenti bo‘lish uchun kechgan ovoz berishda Olamgir 255 ta ovoz to‘pladi, Oli Ahmad esa 88 ta ovoz oldi. Bu Bangladesh 1991-yilda parlamentar demokratiyaga o‘tganidan beri nomzodlar o‘rtasida raqobat bilan o‘tgan birinchi prezidentlik saylovi bo‘ldi.
Ovoz berish jarayoni sobiq prezident Muhammad Shahobiddin iyul oyida salomatligini ro‘kach qilib iste’foga chiqqanidan so‘ng o‘tkazildi. U hokimiyatdan ag‘darilgan bosh vazir Shayx Hasinaning yaqin ittifoqchisi edi.
"Men kambag‘al jamoalar, mehnatkash odamlar va kunbay ishchilar kuniga ikki mahal ovqatlanishi mumkin bo‘lgan baxtli va farovon davlatni orzu qilaman," degan edi 78 yoshli Olamgir ovoz berishdan oldin.
Uning 87 yoshli raqibi Oli Ahmad esa mamlakat Olamgirning prezidentligidan katta umidlari bor ekanini ta’kidladi.
"Sizdan shaxsiy manfaatlarni milliy manfaatlardan ustun qo‘yib, mamlakatga xizmat qilishingizni kutamiz," dedi Oli ovoz berishdan keyin.
Bangladeshning yaqin ittifoqchisi bo‘lgan Xitoy Olamgirni tabrikladi. Xitoyning Dakkadagi elchixonasi yangi davrda umumiy kelajak sari birgalikda intilishini bildirdi.
**Mirza Faxrul Islom Olamgir kim?**
Fevral oyida bosh vazir Toriq Rahmon boshchiligidagi BNP partiyasi saylovda yirik g‘alabaga erishgan edi. Bu Shayx Hasina 2024-yilda hokimiyatdan ag‘darilganidan berigi birinchi saylov bo‘lgandi. Hasina hozir ham Hindistonda surgunda qolmoqda. 2025-yil noyabr oyida u insoniyatga qarshi jinoyatlarda aybdor deb topilib, sirtdan dorga osishga hukm qilingan. Inson huquqlari tashkilotlariga ko'ra, uning boshqaruvi raqiblarni o'ldirish va siyosiy muxolifatni bostirish kabi holatlar bilan kechgan.
1948-yilda tug‘ilgan Olamgir Dakka universitetida iqtisodiyotni o‘rganayotganida siyosatga kirib kelgan. U Pokiston harbiy rejimiga qarshi 1969-yilgi isyonda asosiy talabalar yetakchisi bo‘lgan, keyinchalik esa iqtisodiyot o‘qituvchisiga aylangan. Olamgir 1990-yillar boshida BNP partiyasiga qo‘shilgan va bosqichma-bosqich ko‘tarilgan.
U Hasinaning 15 yillik boshqaruvi davrida muxolifat yetakchisi sifatida tanilgan. Hasina hukumati davrida u qayta-qayta hibsga olingan hamda soxta va siyosiy motivga ega deb bilgan o'nlab ayblovlarga duch kelgan.
OAVda Olamgir Hasina boshqargan qiyin davrlarda BNP partiyasini uyushqoq holda saqlab qolgani va uning siyosiy mavqeyini ushlab turgani uchun e’tirof etilgan. Prezident sifatida u davlat rahbari va qurolli kuchlar bosh qo'mondoni hisoblanadi. Uning 21-avgust kuni kechqurun qasamyod qilishi kutilmoqda.