Bali politsiyasi avstraliyalik erkak va bolalar uyida oʻlik holda topilganidan keyin tergov boshladi
Erkakning rafiqasi xavotirga tushib, qoʻshnilaridan oilasidan xabar olishni iltimos qilganidan soʻng, voqea joyiga politsiya chaqirilgan.
Bali politsiyasi mashhur sayyohlik hududidagi bungaloda avstraliyalik erkak va uning ikki farzandi oʻlik holda topilganidan keyin tergov harakatlarini olib bormoqda.
56 yoshli Demiyen Jon Shou va uning farzandlari — olti yoshli oʻgʻli va toʻrt yoshli qizi yakshanba kuni Kutadagi uyida oʻlik holda topilgan.
Politsiyaning maʼlum qilishicha, erkakning rafiqasi eri bilan telefon orqali gaplashgandan soʻng xavotirga tushib, qoʻngʻiroq qilganidan keyin qoʻshnilar oiladan xabar olishgan. Ayol oʻsha paytda Balida boʻlmagan.
Avstraliya OAVlari politsiya ushbu holatni qotillik va oʻz joniga qasd qilish sifatida koʻrib chiqayotgani haqida xabar berdi. Biroq politsiya BBC'ga oʻlim sababi yoki tarzi hali aniqlanmaganini va qoʻshimcha ekspertizalar oʻtkazilishini maʼlum qildi.
Politsiyaning bildirishicha, erkakning rafiqasi eri bilan gaplashayotganda farzandlaridan birining yigʻlayotganini eshitgach, qoʻshnisiga telefon qilgan. Shundan soʻng u eri bilan qayta bogʻlana olmagan.
Xabar qilinishicha, uning rafiqasi bir necha kun oldin poytaxt Jakartaga joʻnab ketgan boʻlgan.
Politsiyaning maʼlum qilishicha, qoʻshni mahalliy aholi vakillari bilan birgalikda, eshik taqillatilganda javob boʻlmaganidan keyin uyga kuch bilan kirgan. Ichkarida uch nafar qurbon topilgan.
Politsiya Shou asli Gʻarbiy Avstraliyaning Frimantl shahridan boʻlganini bildirdi. Shtat bosh vaziri Rojer Kuk bu xabarni "juda ogʻir vaziyat" deb atadi.
"Bu juda qaygʻuli vaziyat; qalbimiz barcha daxldor insonlar bilan birga. Umid qilamizki, tez orada nima sodir boʻlganining tag-tubiga yetamiz", — deya qoʻshimcha qildi u.