BAA bilan hamkorlikda Qozog‘iston — O‘zbekiston — Afg‘oniston — Pokiston temiryo‘l yo‘nalishi ishlab chiqiladi
Qozog‘iston, O‘zbekiston va BAA Pokiston portlariga chiqish imkonini beruvchi Qozog‘iston — O‘zbekiston — Afg‘oniston — Pokiston (CASA) yangi temiryo‘l yo‘nalishi loyihasini birgalikda ishlab chiqmoqchi. Tegishli memorandum uch mamlakat vazirliklari tomonidan imzolandi.
BAA bilan hamkorlikda Qozog‘iston — O‘zbekiston — Afg‘oniston — Pokiston temiryo‘l yo‘nalishi ishlab chiqiladi
Qozog‘iston, O‘zbekiston va Birlashgan Arab Amirliklari Pokiston dengiz portlariga chiqish imkonini beradigan yangi Qozog‘iston — O‘zbekiston — Afg‘oniston — Pokiston (CASA) temiryo‘l yo‘nalishi loyihasini birgalikda tayyorlashga kelishib oldi.
Qozog‘iston bosh vaziri matbuot xizmati ma’lumotiga ko‘ra, tegishli o‘zaro anglashuv memorandumini O‘zbekiston va Qozog‘iston Transport vazirliklari hamda BAA Energetika va infratuzilma vazirligi vakillari imzoladi.
Xabarda aytilishicha, CASA loyihasi Markaziy va Janubiy Osiyo o‘rtasidagi transport aloqalarini kuchaytirish, shuningdek, xalqaro yuk tashuvlari, savdo, logistika va investitsiyaviy hamkorlikni rivojlantirish uchun yangi imkoniyatlar yaratishga qaratilgan.
Hujjatga muvofiq, tomonlar yaqin vaqt ichida texnik va iqtisodiy tadqiqotlar hamda tahliliy baholashlar o‘tkazib, zarur temiryo‘l infratuzilmasi va unga aloqador obyektlarni qurish maqsadga muvofiqligini o‘rganishi kerak.
Shu bilan birga, loyihaning texnik, iqtisodiy va moliyaviy jihatlarini batafsil ishlab chiqish uchun maxsus ishchi guruh tuzish rejalashtirilmoqda.
Ta’kidlanishicha, Markaziy Osiyo davlatlari rivojlangan temiryo‘l tarmog‘i va yuqori tranzit salohiyatiga ega bo‘lsa, BAA tomoni yirik infratuzilma va logistika loyihalarini moliyalashtirish hamda amalga oshirish bo‘yicha xalqaro tajribasini safarbar etadi.
Ushbu imkoniyatlarning birlashishi CASA loyihasini amaliy bosqichga olib chiqish va uni amalga oshirishning eng maqbul mexanizmlarini belgilashga xizmat qilishi kutilmoqda.
Eslatib o‘tamiz, 2025-yil iyul oyida O‘zbekiston, Afg‘oniston va Pokiston Kobulda Transafg‘on temiryo‘lining texnik-iqtisodiy asoslarini ishlab chiqish bo‘yicha uch tomonlama hadli bitimni imzolagan edi.
Loyiha Afg‘oniston hududi orqali o‘tuvchi, uzunligi 573 km bo‘lgan temiryo‘l magistrali qurilishini nazarda tutadi va Markaziy hamda Janubiy Osiyo mamlakatlarini Pokiston portlariga chiqish imkoniyati bilan bog‘laydigan asosiy transport yo‘laklaridan biri sifatida qaraladi.