Aziz Ganiyev BAAning «Baniyas» klubiga oʻtdi
Oʻzbekiston milliy terma jamoasi yarim himoyachisi Aziz Gʻaniyev bundan avval «Shabab Al-Ahli» tarkibida BAA chempioni boʻlgan edi, endilikda u «Baniyas» klubi bilan shartnoma imzoladi.
Aziz Ganiyev BAAning «Baniyas» klubi aʼzosiga aylandi
Oʻzbekiston milliy terma jamoasi yarim himoyachisi Aziz Ganiyev BAAda toʻp suradigan «Baniyas» futbol klubi bilan shartnoma imzoladi. Ushbu transfer jamoaning yangi mavsum oldidan asosiy tarkibni kuchaytirish borasidagi ishlarining bir qismi boʻldi. Bu haqda «Baniyas» futbol klubi maʼlum qildi.
Ganiyev bilan shartnoma imzolash marosimi klub direktorlar kengashi aʼzosi Ahmad Al-Jabri ishtirokida boʻlib oʻtdi. U oʻzbekistonlik yarim himoyachini jamoada qutlab, faoliyatining yangi bosqichida unga muvaffaqiyatlar tiladi.
Ganiyev BAA chempionati — ADNOC Pro League musobaqasida oʻynash tajribasiga ega va xalqaro maydonda Oʻzbekiston milliy terma jamoasi sharafini himoya qilishda davom etmoqda.
Bundan avval yarim himoyachi «Shabab Al-Ahli» klubida toʻp surgan. 2022/23 yilgi mavsumda jamoa ADNOC Pro League chempionlik unvonini qoʻlga kiritgan edi.
Bundan tashqari, Ganiyev klub bilan birgalikda ichki maydonda bir qancha muvaffaqiyatlarga erishgan.
«Baniyas»da uning tajribasi va oʻyin sifatlari jamoa tarkibini kuchaytirishga yordam berishiga hamda klubning kelasi mavsumdagi maqsadlariga erishishiga xizmat qilishiga umid bildirishmoqda.