Avtobusda baland ovozda musiqa eshityapsizmi? Bu Singapurda sizga yuzlab dollarga tushadi
Hukumat bortda ovqatlanish va oyoqlarni oʻrindiqlarga qoʻyish kabi «tartibbuzarlik xulq-atvorlari»ga qarshi qatʼiy choralar koʻrmoqda.
Avtobusda baland ovozda musiqa eshityapsizmi? Singapurda bu endi sizga yuzlab dollarga tushishi mumkin.
Singapurda avtobus yoʻlovchilari oʻrindiqlarga oyoqlarini qoʻyganlik yoki baland ovozda audio eshitganlik, shuningdek, transport ichida taomlanganlik, ichimlik ichganlik yoki axlat tashlaganlik uchun 500 Singapur dollarigacha (391 dollar; 293 funt sterling) jarimaga tortilishi mumkin.
Yanada jiddiyroq huquqbuzarliklar, jumladan, avtobus terminallari ichida boshqa yoʻlovchilarga toʻsqinlik qilish yoki xavf tugʻdirish yoxud «jamoat avtobusi, avtobus bekati yoki terminalining biror-bir qismini ifloslantirish» uchun 5 000 Singapur dollarigacha jarima qoʻllaniladi.
«Bu choralar barcha uchun xavfsizroq, eʼtiborliroq va yoqimliroq jamoat transporti muhitini yaratadi», deyiladi Quruqlikdagi transport boshqarmasi (LTA) xabarida.
Dushanba kuni eʼlon qilingan yangi qoidalar Singapur temir yoʻli yoki Tezkor ommaviy tranzit (MRT) tarmogʻidagi mavjud qoidalarga mos keladi.
Biroq, MRT yoʻlovchilari vagon ichida taomlanish kabi qoidabuzarliklar uchun anchadan beri jarimaga tortilib kelingan boʻlsa-da, avtobus qoidalari odatda shunchaki haydovchilar tomonidan nazorat qilinadigan kompaniya siyosati edi va ular yoʻlovchilardan tushib ketishni talab qilishlari mumkin edi.
Endilikda bunday xalaqit beruvchi xatti-harakatlar rasmiy huquqbuzarlikka aylandi va ular uchun darhol jarima solinadi.
LTA maʼlumotlariga koʻra, vakolatli avtobus xodimlari, jumladan, chipta nazoratchilari va avtobus bekatlari xodimlari qoidabuzarlik sodir etganlikda gumon qilingan yoʻlovchilarga rasmiy bildirishnomalar berishlari mumkin.
Avtobus haydovchilari yoki Singapurda atalganidek «kapitanlar» bunday vakolatga ega boʻlmaydi, bu esa ularga eʼtiborni avtobusni xavfsiz boshqarishga qaratish imkonini beradi. Ular hali ham yoʻlovchilardan tartibbuzarlikni toʻxtatishni talab qilishlari mumkin va hamkorlik qilishdan bosh tortganlardan avtobusni tark etish soʻralishi yoki jiddiy holatlarda politsiya aralashuviga duch kelishlari mumkin.
Singapur jamoat transportini tinchroq qilishga harakat qilayotgan yagona joy emas. Transport tizimlari kengaygani sari, butun dunyo boʻylab shaharlar hamma uchun osoyishta sayohatni taʼminlash maqsadida yomon xulq-atvorga qarshi tobora koʻproq choralar koʻrmoqda.
Shu yil boshida Polshaning Krakov shahrida ham shunga oʻxshash qoidalar joriy etildi, unga koʻra yoʻlovchilar oʻz mobil telefonlari va boshqa elektron qurilmalari bilan «transport vositasi ichidagi osoyishtalik va tinchlikni buzganliklari» uchun 200 zlotiygacha (52 dollar; 39 funt sterling) jarimaga tortilishi mumkin.
Buyuk Britaniyada amaldagi qonunlar poyezdlarda va stantsiyalarda «antisotsial xulq-atvor»ni, jumladan, agar boshqalarga xalaqit bersa, ruxsatsiz «tovush chiqaruvchi uskunalar»dan foydalanishni taqiqlaydi.
Baʼzi siyosatchilar barcha jamoat transportlarida, jumladan, avtobuslarda baland ovozda musiqa va videolar qoʻyadigan «quloqchinsizlar» uchun 1 000 funt sterlinggacha boʻlgan maxsus jarimalar joriy etishga chaqirishdi.
Singapur, Krakov va Buyuk Britaniyadagi qoidalar transport idoralarining yoʻlovchilarni himoya qilishga kirishayotgani borasidagi keng tarqalgan tendentsiyani aks ettiradi.
«Jamoat transporti umumiy makondir va har bir yoʻlovchi xushmuomala va yoqimli yoʻl muhitini taʼminlashda oʻz hissasini qoʻshishi kerak», dedi Singapur LTA vakili.