Avstriya harbiy xizmat tizimini isloh qilmoqda
Avstriya hukumati majburiy harbiy xizmat muddatini olti oydan to‘qqiz oygacha uzaytirishni nazarda tutuvchi islohotni ma’qulladi. Yangi tartibga ko‘ra, asosiy tayyorgarlikdan keyin majburiy dala mashg‘ulotlari joriy etiladi. Hukumat bu o‘zgarishlarni Yevropa xavfsizlik muhitidagi o‘zgarishlar, jumladan Rossiyaning Ukrainaga qarshi urushi bilan izohlamoqda.
Avstriya hukumati mamlakatdagi majburiy harbiy xizmat tizimini isloh qilish bo‘yicha kelishuvga erishganini 27-iyul kuni rasmiylar ma’lum qildi.
Uzoq davom etgan muzokaralardan so‘ng, hukmron koalitsiya – Avstriya Xalq partiyasi (ÖVP), Sotsial-demokratik partiya (SPÖ) va liberal Neos partiyasi – harbiy xizmat muddatini uch oyga uzaytirishga kelishib oldi.
Islohotga ko‘ra, chaqiriluvchilar dastlab olti oylik bazaviy harbiy tayyorgarlikdan o‘tadi. Shundan so‘ng, ular uchun qo‘shimcha majburiy dala mashg‘ulotlari joriy etiladi. Bu mashg‘ulotlarni zaxira qo‘shinlari tarkibida xizmat qiluvchilar o‘n yil davomida istalgan vaqtda o‘tashi mumkin bo‘ladi.
Hukumatning ta’kidlashicha, taklif etilayotgan bosqichma-bosqich tizim ekspertlar komissiyasi tavsiyalariga asoslangan.
Islohot doirasida harbiy xizmatni yoshlar uchun yanada jozibador qilish choralari ham ko‘zda tutilgan. Xususan, harbiy xizmatchilarga ta’til kunlari berilishi rejalashtirilmoqda. Shuningdek, xizmat davrida to‘lanadigan oylik nafaqa 1000 yevrogacha oshiriladi.
Avstriya kansleri Kristian Shtokerning so‘zlariga ko‘ra, mamlakat mudofaa salohiyatini kuchaytirish zarurati Yevropa xavfsizlik muhitidagi o‘zgarishlar bilan bog‘liq. U Rossiyaning Ukrainaga qarshi urushi, kiberhujumlar, gibrid tahdidlar va muhim infratuzilmaga qarshi xavflar xavfsizlik siyosatiga yangicha yondashuvni talab qilayotganini aytdi.
Kanslerning ta’kidlashicha, "Yevropada barqaror tinchlik haqidagi orzu Rossiya agressiyasi boshlanganidan keyin parchalandi". Uning so‘zlariga ko‘ra, faqat yangi harbiy texnika sotib olishning o‘zi yetarli emas; favqulodda vaziyatlarda harbiylar undan samarali foydalanishi uchun amaliy tayyorgarlik ham kuchli bo‘lishi lozim.
Endi hukumat parlamentdagi Avstriya Ozodlik partiyasi (FPÖ) va "Yashillar" partiyasining qo‘llab-quvvatlovini olishga harakat qiladi, chunki mazkur o‘zgarishlarni qabul qilish uchun parlament a’zolarining kamida uchdan ikki qismi ovozi talab etiladi.
Agar qonun ma’qullansa, yangi tartib 2027-yil 1-yanvardan kuchga kirishi rejalashtirilgan. Hozircha to‘qqiz oylik muqobil fuqarolik xizmati muddati o‘zgarmaydi. Biroq, 2027-yildan uni ikki oyga ixtiyoriy ravishda uzaytirish imkoniyati yaratiladi. 2028-yildan esa chaqiriluvchilar soni rejadagi darajaga yetmasa, ushbu uzaytirish majburiy tus oladi.
Avstriya harbiy betaraf davlat hisoblanadi va NATO a’zosi emas.