Avstraliya seriyali qotilni qamoqdan ozod etmoqchi
Avstraliya seriyali qotilni qamoqdan ozod etmoqchi
Avstraliya sudi 11 kishining o‘ldirilishi bo‘yicha sudlangan seriyali qotillardan birini qamoqdan shartli ravishda ozod qilish mumkinligi haqida qaror chiqardi.
Qurbonlar yetti yil davomida o‘ldirilgan, ularning aksariyatining jasadi 1999-yilda Snoutaun shahrida kislota solingan bochkalardan topilgan. Shu bois jinoyatlar “Bochkalardagi jasadlar” nomi bilan mashhur bo‘lgan. Ushbu voqealar hamda 2003-yilda yakunlangan bir yillik sud jarayoni ko‘plab kitoblarga va 2011-yilda suratga olingan “Snoutaun” filmiga asos bo‘lgan.
Mazkur ish bo‘yicha sudlangan uch qotil orasida eng yoshi Jeyms Vlassakis hisoblanadi. U jinoyatlarini 1998-yilda, 18 yoshida boshlagan. Vlassakis to‘rt kishini o‘ldirganini tan olgan. U umrbod qamoq jazosiga hukm qilinib, kamida 26 yil qamoqda o‘tashi belgilangan edi. Bu muddat 2025-yil avgustida tugagan.
Vlassakis avval dekabr oyida shartli ravishda ozod qilingan, biroq shtat hukumati bu qarorga e’tiroz bildirib, uni bekor qildirishga erishgan. Shunga qaramay, Janubiy Avstraliya Apellyatsiya sudining uch nafar sudyasi shartli ozodlik haqidagi dastlabki qarorni o‘z kuchida qoldirdi.
Shartli ozod qilish kengashi raisi Frensis Nelsonning aytishicha, Vlassakis qilgan ishlaridan pushaymon. Bundan tashqari, unga antisotsial shaxsiyat buzilishi tashxisi qo‘yilmagan va qamoqdagi xulq-atvori “a’lo” deb baholangan.
Janubiy Avstraliya bosh prokurori Kyam Maher esa bu qarorga qarshi chiqqan. U jinoyatlarning nihoyatda og‘irligi va jabrlanuvchilarning yaqinlariga yetkazilgan ruhiy jarohat Vlassakisni qamoqda saqlashni oqlashini ta’kidlagan.