Avstraliya choʻli gullarga burkandi - NASA uni kosmosdan koʻrsatdi
Gʻarbiy Avstraliyada qishki yomgʻirlardan keyin qurgʻoqchil hududlar yovvoyi gullar bilan qoplandi. Landsat 8 sunʼiy yoʻldoshi yashil tusga kirgan manzarani tasvirga oldi. Mahalliy observatoriya yerlari boshqaruvchisi esa 2008-yildan beri bunday sergul mavsumni koʻrmaganini aytdi.
Avstraliya choʻli gullarga burkadi — NASA uni kosmosdan namoyish etdi
NASA Pertdan taxminan 600 kilometr shimolda joylashgan Merchison hududining sunʼiy yoʻldosh tasvirlarini eʼlon qildi. 2026-yil 30-avgustda olingan suratda oʻsimliklar 2025-yil 19-avgustdagi tasvirga qaraganda ancha yashil koʻrinadi. Agentlik bu taqqoslashni 23-sentabr kuni taqdim etgan.
NASA va AQSH Geologiya xizmatining qoʻshma Landsat 8 sunʼiy yoʻldoshi olgan tasvirlarda daryo oʻzanlari, yoʻllar hamda sargʻish-qoʻngʻir tuproq maydonlari yaqqol koʻrinadi. Yomgʻirdan keyin paydo boʻlgan yashil tasma, ayniqsa, oʻzanlar boʻylab aniq ajralib turadi.
Yerdan olingan suratlar esa gullash miqyosini koʻrsatdi. Siyrak daraxtlar va butalar orasida oq, sariq hamda pushti-binafsha gullardan iborat keng maydonlar paydo boʻlgan.
Gullashdan avval hududda seryogʻin qish kuzatilgan. Avstraliya Meteorologiya byurosi maʼlumotiga koʻra, iyunda Gʻarbiy Avstraliya boʻyicha oʻrtacha yogʻingarchilik 30,1 millimetrni tashkil etib, 1961–1990-yillar meyoridan 12 foiz yuqori boʻlgan. Avgustda esa 24 millimetr yogʻin qayd etilgan — bu meyordan 62 foiz koʻp. Bu raqamlar alohida gulzorga emas, butun shtatga tegishli.
CSIRO radioastronomiya observatoriyasi yerlari boshqaruvchisi Endryu Uitmarsh bu yilgi gullashni erta yogʻgan yomgʻirlar bilan bogʻladi. Uning aytishicha, namlik yillar davomida tuproqda tinim holatida saqlangan urugʻlarning unib chiqishiga imkon bergan. Natijada koʻplab turlar bir vaqtda gullagan.
«2008-yildan beri bunday yaxshi gullashni koʻrganman, deb oʻylamayman», - degan Uitmarsh.
ASKAP radioteleskopi antennalari yonida oq Cephalipterum drummondii gullari ochilgan. Oʻtlar orasida Ptilotus turkumiga mansub pushti-binafsha oʻsimliklar, qizil tuproqda esa Calandrinia mirabilis gullamoqda.
Observatoriya xodimlari bioxilma-xillik mutaxassislari bilan birga oʻsimliklar populyatsiyalarini oʻrganmoqda. Calandrinia mirabilis’ning yangi oʻsish joylari topilishi 2025-yilda uni mintaqaviy roʻyxatda Priority 1 toifasidan Priority 3 toifasiga oʻtkazishga imkon bergan. Bu tur hali ham qoʻshimcha tadqiqotlarga muhtoj hisoblanadi.