Avgustda Oʻzbekistonga mol goʻshti importi 23 foizga oshdi

Avgust oyida Oʻzbekistonga mol goʻshti importi 23 foizga oshdi

Avgustda yil boshidan buyon eng katta hajmdagi mol goʻshti importi qayd etildi. Bu Bojxona qoʻmitasi eʼlon qilgan maʼlumotlarda keltirilgan.

2026-yil avgustida Oʻzbekistonga jami qiymati 85,6 mln dollarlik 21 ming tonna mol goʻshti olib kelindi. Bu iyul oyidagi koʻrsatkichdan 3 ming tonnaga, yaʼni 23,4 foizga koʻp. Ushbu oʻsish yil boshidan beri kuzatilgan eng yuqori natija hisoblanadi.

Yanvarda xorijdan 11,6 ming tonna, fevralda 14,3 ming tonna, martda 12,7 ming tonna goʻsht import qilingan. Shuningdek, aprelda 11,2 ming tonna, mayda 9,3 ming tonna, iyunda esa 12,9 ming tonna mahsulot xarid qilingan.

Umuman olganda, joriy yilning yanvar-avgust oylarida mamlakatga jami qiymati 519 mln dollarlik 111,1 ming tonna mol goʻshti import qilindi. Bu koʻrsatkich 2025-yilning shu davridagiga nisbatan 21 ming tonnaga oshgan.

Ayni paytda Oʻzbekistonda goʻshtga yillik talab 2,1 million tonnadan ortiqni tashkil etadi. Mahsulot ishlab chiqarish hajmi esa 1,6 million tonna. Shu sabab hukumat chorvachilik tarmogʻini rivojlantirish uchun 463 million dollar yoʻnaltirishni rejalashtirgan. Sohaga bir qator imtiyozlar berish va uni qoʻllab-quvvatlash choralari eʼlon qilingan.

Avvalroq masʼullarga 2026-yil yakunigacha chetdan 100 ming bosh qoramol olib kelish vazifasi yuklatilgandi.